Намунавий =оида

2-§. Меҳнатни муҳофаза қилиш хизматини ташкил қилиш
39. Ўзбекистон Республикаси “Меҳнатни муҳофаза қилиш тўғрисида”ги Қонунининг 12-моддасига мувофиқ ишлаб чиқариш фаолиятини амалга оширувчи, ходимларининг сони эллик киши ва ундан ортиқ бўлган ҳар бир ташкилотда меҳнатни муҳофаза қилиш талабларига риоя этилишини таъминлаш, уларнинг бажарилиши устидан назоратни амалга ошириш мақсадида меҳнатни муҳофаза қилиш хизмати ташкил этилади ёки меҳнатни муҳофаза қилиш бўйича тегишли тайёргарликка эга бўлган мутахассис лавозими жорий этилади.
Ходимларининг сони эллик нафардан кам бўлган ташкилотда меҳнатни муҳофаза қилиш хизматини ташкил этиш ёки меҳнатни муҳофаза қилиш бўйича мутахассис лавозимини жорий этиш тўғрисидаги қарор иш берувчи томонидан мазкур ташкилот фаолиятининг ўзига хос хусусияти ҳисобга олинган ҳолда қабул қилинади.
Хизматнинг мавжуд штат бирликларини қисқартириш ёки ташкилотининг бошқа таркибий бўлинмаларига қайта тақсимлаш мумкин эмас. Хизмат бевосита ташкилот раҳбарига бўйсунади.
40. Корхонадада меҳнатни муҳофаза қилиш хизматини яратиш ва фаолиятини ташкил этиш Ўзбекистон Республикаси Вазирлар Маҳкамасининг 2018 йил 31 декабрдаги 1066-сон қарори билан тасдиқланган “Ташкилотларда меҳнатни муҳофаза қилиш хизматини яратиш ва фаолиятини ташкил этиш тартиби тўғрисида Низом”га мувофиқ амалга оширилади.
41. Меҳнатни муҳофаза қилиш хизматлари касаба уюшмаси қўмитаси билан келишилган иш режалари бўйича ишлайди.
42. Меҳнатни муҳофаза қилиш мутахассислари уларнинг лавозим вазифаларига кирмайдиган ишларни бажаришга жалб қилинмаслиги керак.
43. Меҳнатни муҳофаза қилиш хизматлари корхона ўз фаолиятини тўхтатган тақдирдагина тугатилади.
44. Меҳнатни муҳофаза қилиш хизматининг вазифалари меҳнатни муҳофаза қилиш соҳасидаги хизматлар бозорининг профессионал иштирокчилари томонидан шартнома асосида амалга оширилиши мумкин.
3-§. Меҳнатни муҳофаза қилиш хизмати вазифалари
45. Қуйидагилар меҳнатни муҳофаза қилиш хизматининг асосий вазифалари ҳисобланди:
ходимлар томонидан меҳнатни муҳофаза қилиш талаблари бажарилишини таъминлаш бўйича ишларни ташкил этиш;
меҳнатни муҳофаза қилишга доир қонунлар ва бошқа норматив ҳуқуқий ҳужжатлар, меҳнатни муҳофаза қилиш масалалари бўйича техник жиҳатдан тартибга солиш соҳасидаги норматив ҳужжатлар, жамоа келишувлари, шунингдек жамоа шартномалари ва бошқа локал норматив ҳужжатлар талабларига ходимлар риоя этишини назорат қилиш;
ишлаб чиқаришда жароҳат олишнинг, касб касаллигига чалинишнинг ва ишлаб чиқариш омиллари билан изоҳланадиган касалликларнинг олдини олиш бўйича профилактика ишларини, шунингдек, меҳнат шароитларини яхшилаш ишларини ташкил этиш;
корхона раҳбари ва ходимларини меҳнатни муҳофаза қилиш масалалари бўйича хабардор қилиш ва маслаҳат бериш, меҳнатни муҳофаза қилиш бўйича илғор тажриба ва илмий ишланмаларни жорий этиш, меҳнатни муҳофаза қилиш масалаларини тарғиб қилиш;
меҳнатни муҳофаза қилиш масалалари бўйича корхона ходимларини кириш йўл-йўриқларидан ўтказиш ҳамда уларни ўқитиш, тайёрлаш, қайта тайёрлаш ва уларнинг малакасини ошириш тадбирларини амалга ошириш.
46. Хизмат меҳнатни муҳофаза қилишга оид талабларига риоя этилиши юзасидан давлат назорати ва текширувини амалга оширувчи органларига меҳнатни муҳофаза қилиш масалалари бўйича маълумот, ахборот, материаллар тақдим этилишини таъминлайди.