N. B. Dilmurodov

Bilaguzuk bo‘g‘imi va barmoq bo‘g‘imi muskullari 
Bilaguzuk bo‘g‘imi muskullari 
Yozuvchi muskullar – extenzor.
Bilaguzuk bo‘g‘imini yozuvchi bilak muskuli – m.extensor carpi radialis
elka suyagining yon to‘piqsimon qismidan boshlanib, kaft suyagining notekis 
yuzasiga birlashadi. Uning pastki qismi bo‘g‘im ustida sinovial qinga kirib turadi. 
Vazifasi: bilaguzuk bo‘g‘imini yozadi. 
Hayvonlardagi farq qiluvchi xususiyatlari.
Otda – bu muskulning pay 
qismiga elkaning ikki boshli muskulini kuchli rivojlangan payli qismiga yaqin 
kelib joylashadi. Cho‘chqada – bilaguzuk bo‘g‘imini yozuvchi bilak muskuli III 
kaft suyagida tugaydi. Itda – muskulning ikkita qorinchasi bo‘ladi: ulardan – yuza 
qismi ikkinchi kaft suyagida, chuqur qismi esa uchinchi kaft suyagida tugaydi. 
Birinchi barmoqni uzoqlashtiruvchi uzun muskul – m.abductor policis 
longus
bilak suyagining yonidan boshlanib, bilaguzuk bo‘g‘imi ustidan o‘rta 
tomonga o‘tadi va kaft suyagining ichki notekis joyida tugaydi. Bu muskul ham 
sinovial qinga o‘ralgan bo‘ladi. Ot va cho‘chqalarda bu muskul II kaft suyagida 
tugaydi. Itda – I kaft suyagida tugaydi. Vazifasi: bilaguzuk bo‘g‘imini yozadi. 
Bukuvchi muskullar – flexor.
Bilaguzuk bo‘g‘imini yozuvchi tirsak muskuli – m. extensor carpi ulnaris
elka suyagining to‘pig‘idan boshlanib, V kaft suyagida va bilaguzukning 
qo‘shimcha suyagida tugaydi. Bu muskul “yozuvchi” nomi bilan yuritilsada, o‘zi 
bukish vazifasini o‘taydi. Otda – qo‘shimcha suyakda va IV-kaft suyagida tugaydi. 
Cho‘chqada – qo‘shimcha suyakda va V kaft suyagida tugaydi. 
Itda – V kaft suyagida tugaydi. 
Bilaguzuk bo‘g‘imini bukuvchi bilak muskuli – m.flexsor carpi radialis
elka suyagining bo‘rtigidan boshlanib, to kaft suyagining ichki yuzasigacha keladi. 
Bilaguzuk bo‘g‘imida sinovial qinga o‘ralgan bo‘ladi. Vazifasi: bilaguzuk 
bo‘g‘imini bukadi. Otda – bu muskul II kaft suyagida; cho‘chqada – III-kaft 
suyagida; itda – II va III kaft suyaklarida tugaydi.