Murakkab sharoitlarda neft va gaz quduqlarini qazish

Asboblarning uchishi bilan bog‘liq halokatlar. Asboblar uchishining sabablari: tushirish vaqtida asboblarning buralib ketishi, elevator va boldoqning ishlamay qolishi, tal arqonining uzilishi. Asboblarni tushirish vaqtida buralib ochilib ketishining oldini olish uchun qulf rezbalari ikkita mashina kaliti bilan mahkamlanadi.

Geofizik ishlar bilan bog‘liq halokatlar. Neft va gaz quduqlarini burg‘ilash jarayonida geofizik ishlarni bajarish uchun kon-geofizika va karotaj stansiya qurilmalaridan foydalaniladi. Geofizik usullar yordamida quduqlarning geologik kesimi, mahsuldor qatlamlarning xossalari, burg‘ilanayotgan va tugatilgan quduqlarning holati o‘rganiladi. Undan tashqari ishlayotgan quduqlarni o‘rganish jarayonida har xil o‘lchash ishlarini bajarish, mahsuldor qatlamlarni ochishda mustahkamlovchi quvurlarni perforatsiyalash hamda halokat vaqtida burg‘ilash asboblarini va quvurlar birikmasini quduqdan chiqarish uchun ularni perforatsiyalash, suyuqlik va gaz oqimi sharoitlarini yaxshilash kabi ishlar ham qilinadi.

Neft va gaz quduqlarini burg‘ilash bilan bog‘liq olib borilayotgan geofizik ishlar natijasida har xil halokatlar sodir bo‘lishi mumkin. Bunday halokatlarga sabab burg‘ilash quduqlarining geofizik (karataj) ishlar olib borilishiga tayyor emasligi, kabellarning eskirib siyqalanganligi, karataj asboblarining tutilib qolishi hamda asboblarni quduqqa tushirish va ko‘tarishda ayrim xodimlarning e’tiborsizligi va mas’uliyatsizligi bo‘lishi mumkin. Shuning uchun quduqlarga tushiriladigan kabellar quyidagi xususiyatlarga ega bo‘lishi kerak:

а) yetarli mustahkam bo‘lishi;

b) yuqori haroratga va suv bosimiga chidaydigan izolyatsiyaga ega bo‘lishi;

d) tok o‘tkazuvchi simlarning elektr qarshiligi past darajada bo‘lishi.