Murakkab sharoitlarda neft va gaz quduqlarini qazish

Mustahkamlovchi quvurlar bilan bog‘liq halokatlar. Mustahkamlovchi quvurlar bilan bog‘liq halokatlarga mustahkamlovchi quvurlar birikmasining uzilishi, tutilishi, ezilishi va boshmoqlarning buralib ketishi va boshqalar kiradi.



10.2-rasm. Quvurlarning tutilishi.

Mustahkamlovchi quvurlar bilan bog‘liq halokatlarning sodir bo‘lish sabablari:

-quvur oxiri rezbasi va muftalarining sifati va holati tekshirilmaganligi va quvurni burash qoidalarining buzilishi natijasida mustahkamlovchi quvurlarning uzilishi;

-quvur o‘q(stvol)ining tayyorlanmaganligi yoki sifatsiz gilli eritmaning ho‘llanishi natijasida quvurlar birikmasining tutilishi;

-burg‘ilash quvurlar birikmasini quduqqa tushirishdan oldin sinalmaganligi natijasida ichki bosim ta’sirida uzilishi;

-rezba ulanish joylarining yaxshi mustahkamlanmaganligi va sifatsiz sementlanganligi tufayli rezbalarning buralib ketishi;

-quvur birikmasi boshmog‘ining buralib ketishi va mustahkamlovchi quvurlarning ishqalanishi.

Quvur birikmasining pastki qismi yaxshi mustahkamlanmaganda quvur birikmasi boshmog‘i buralib ketishi mumkin. Rotor bilan burg‘ilashda sementlanmagan boshmoq burg‘ilash quvuri muftasining ishqalanishidan buralib ketadi. Buralib ketgan boshmoqning joylashgan joyini aniqlash uchun mustahkamlovchi quvur bo‘lagidan yasalgan pechat quduqqa tushiriladi. Pechatning pastki qismi voronka shaklida bo‘ladi. Pechat buralib ketgan boshmoqqacha tushiriladi va u orqali boshmoq qanday joylashganligi aniqlanadi. Bunda halokat cho‘qqi shaklidagi burg‘i orqali bartaraf etiladi.