Молиявий ҳисоб 1 Ўқув қўлланма

1.6. Пул оқимлари тўғрисида ҳисоботдаги ёритишлар
Пул оқимлари тўғрисидаги ҳисобот пул оқимларини операцион, инвестиция ва молиявий фаолият бўйича туркумлаган ҳолда (бевосита ёки билвосита усулларни қўллаган ҳолда) давр бўйича пул оқимларини тақдим этиши лозим. Ғайриодатий ҳодисалар билан боғлиқ пул оқимлари тегишли равишда операцион, инвестиция ёки молиявий фаолият натижасида вужудга келадиган деб туркумланиши ва алоҳида ёритилиши лозим.
Фоизлардан ва дивидендлардан олинган ва тўланган пул маблағларининг оқимлари ажратилган ҳолда ёритилиши лозим.
Пул маблағлари ёки уларнинг эквивалентларидан фойдаланишни талаб қилмайдиган инвестицияларга оид ва молиявий операциялар ҳисоботга киритилмаслиги лозим. Бунга ўхшаш операциялар ушбу инвестиция ва молиявий фаолият тўғрисидаги барча ўринли маълумот молиявий ҳисоботда тўлиқ таъминланган тарзида ёритилиши лозим.
Компания фойдаланиб бўлмайдиган пул маблағларининг муҳим қолдиқларининг суммаларини ёритиши лозим.
1.7. Тақсимланмаган фойданинг ёритилиши
Субъект ўз молиявий ҳисоботининг алоҳида шакли сифатида қўйидагиларни акс эттирувчи ҳисоботни тақдим этиши лозим:
1. Давр бўйича соф фойда ёки зарар
2. Стандартлар талабига мувофик бевосита капиталда тан олинадиган даромадлар ва харажатлар, фойда ва зарарларнинг ҳар бир моддасини ва ушбу моддаларнинг суммасини
3. Ҳисобнинг стандарт тартибида 8-МҲХС “Давр бўйича соф фойда ёки зарар, ҳисоб сиёсатидаги аҳамиятли хатолар ва ўзгаришлар”да кўрилаётган ҳисоб сиёсатидаги ўзгаришларнинг кумулятив самараси ва аҳамиятли хатоларни тузатишлар
Бундан ташқари, субъект ёхуд ушбу ҳисоботда, ёхуд унинг иловасида қўйидагиларни тақдим этиши лозим:
1. Хусусий капиталнинг таркибини ўзгартириш бўйича операциялар ва дивидендларнинг тақсимланиши;
2. Давр бошига ва ҳисобот кунига жамланган фойда ёки зарарнинг қолдиғи ва давр мобайнидаги ўзгаришлар;
3. Акциядорлик капитали ҳар бир тоифасининг баланс қиймати, эмиссия даромади ва давр боши ва охирига ҳар бир резерни ҳар бир ўзгаришни алоҳида ёритилиши билан солиштириш.
Икки ҳисобот санаси ўртасида капиталдаги ўзгаришлар молиявий ҳисоботда қабул қилинган ва ёритиладиган баҳолашнинг аниқ тамойилидан келиб чиқиб давр мобайнида соф активларининг кўпайиши ёки камайишини акс этади. Капиталдаги умумий ўзгаришлар давр мобайнида компания фаолияти натижасида вужудга келган фойда ёки зарарларнинг суммасини (капитални киритиш ва дивидендлар каби акциядорлар билан амалга ошириладиган операциялардан ташқари) ифодалайди.