Молия / Солиқлар (йиғимлар, божлар)]

9-боб. Ҳудудлараро инспекциянинг ҳисоботи
38. Ҳудудлараро инспекция бошлиғи Ҳудудлараро инспекциянинг фаолияти тўғрисида Қўмита раиси олдида мунтазам равишда ҳисобот беради.
39. Қўмита раисининг ўринбосарлари Ҳудудлараро инспекция раҳбарларига юкланган вазифаларни самарали бажаришлари бўйича уларнинг фаолиятини доимий назорат қилиб борадилар.
40. Ҳар чораклик баҳо натижалари бўйича Ҳудудлараро инспекциянинг алоҳида ўрнак кўрсатган раҳбарлари ва ходимлари рағбатлантирилади ёки йўл қўйилган жиддий камчиликлари учун эгаллаб турган лавозимидан озод қилишгача бўлган жавобгарликка тортилади.
10-боб. Якунловчи қоида
41. Ҳудудлараро инспекция ходимларига таъсир кўрсатиш, шунингдек, фаолиятига обрўсизлантириш, юкланган вазифа ва функцияларни бажаришига тўсқинлик қилиш мақсадида аралашиш тақиқланади ва қонун ҳужжатларида белгиланган тартибда жавобгарликка сабаб бўлади.
Вазирлар Маҳкамасининг 2019 йил 17 апрелдаги 320-сон қарорига
3-ИЛОВА
Ўзбекистон Республикаси давлат солиқ хизмати органларида хизматни ўташ тўғрисида
НИЗОМ
1-боб. Умумий қоидалар
1. Ушбу Низом Ўзбекистон Республикаси давлат солиқ хизмати органларига (кейинги ўринларда солиқ органлари деб аталади) мансабдор шахсларни хизматга қабул қилиш ва уларни бўшатиш, улар томонидан хизматни ўташ, махсус унвонлар бериш ва улардан маҳрум қилиш, уларни рағбатлантириш ва интизомий жавобгарликка тортиш тартибини белгилайди.
2. Ушбу Низомда қуйидаги асосий тушунчалардан фойдаланилади:
раҳбарлик лавозимлари — солиқ органларининг бошқарув функцияларини амалга оширувчи, ходимларга раҳбарлик қилувчи, тегишли қарорларни ишлаб чиқувчи ва қабул қилувчи, солиқ органлари фаолияти жараёнларини режалаштирувчи, назорат қилувчи ва тартибга солувчи, қўйилган мақсадга эришиш ҳамда солиқ органларига юкланган вазифалар ва функцияларни бажариш учун зарур ташкилий-техник шарт-шароитлар билан таъминловчи ходимлари лавозимлари;
инспекторлар таркиби лавозимлари — мазкур банднинг иккинчи хатбошида кўрсатилган ваколатлар берилмаган ҳолда солиқ органларига юкланган вазифалар ва функцияларни бажарувчи солиқ органлари ходимлари лавозимлари.
3. Солиқ органлари мансабдор шахсларига (кейинги ўринларда мансабдор шахслар деб аталади) солиқ органларида бошқарув ходимларининг штатидаги лавозимларни эгаллаб турган шахслар киради ва уларга эгаллаб турган лавозимларига ҳамда узоқ муддат ишлаганлигига мувофиқ равишда қуйидаги махсус унвонлар берилади:
солиқ хизматининг бош давлат маслаҳатчиси;
солиқ хизматининг I даражали давлат маслаҳатчиси;
солиқ хизматининг II даражали давлат маслаҳатчиси;
солиқ хизматининг III даражали давлат маслаҳатчиси;
солиқ хизматининг I даражали маслаҳатчиси;
солиқ хизматининг II даражали маслаҳатчиси;
солиқ хизматининг III даражали маслаҳатчиси;
солиқ хизматининг I даражали инспектори;
солиқ хизматининг II даражали инспектори;
солиқ хизматининг III даражали инспектори;
солиқ хизматининг инспектори.
Олдинги таҳрирга қаранг.
Ишлаб чиқариш ходимларига техник ва хизмат кўрсатувчи ходимлар тоифасига мансуб бўлмаган солиқ органларида штат лавозимларини эгаллаб турган мутахассислар киради.
Мутахассисларнинг (ишлаб чиқариш ходимларининг) штатлар сони қуйидаги тартибда белгиланади:
Тадбиркорликни қўллаб-қувватлаш бўлими (шуъбаси):
100 минг нафар аҳолига ҳисоблаб чиққанда 1 штат бирлиги — туман (шаҳар) давлат солиқ инспекцияларида;
2 штат бирлиги — Қорақалпоғистон Республикаси, вилоятлар ва Тошкент шаҳар давлат солиқ бошқармаларида;
2 штат бирлиги — Ўзбекистон Республикаси Давлат солиқ қўмитасининг (кейинги ўринларда — Қўмита) марказий аппаратида;
навбатчи қисм ва идоравий қўриқлаш:
15 штат бирлиги — Қўмита марказий аппаратида;
3 штат бирлиги — Қўмитанинг ҳудудий тузилмалари ҳамда Йирик солиқ тўловчилар бўйича ҳудудлараро давлат солиқ инспекциясида;
солиқ тўловчиларнинг бухгалтерия ҳисобини юритиш ва ҳуқуқий қўллаб-қувватлаш хизматида (туман (шаҳар) давлат солиқ инспекцияларида) — 2 штат бирлиги.
(3-банд Ўзбекистон Республикаси Вазирлар Маҳкамасининг 2021 йил 7 январдаги 1-сонли қарорига асосан ўн учинчи — йигирма иккинчи хатбошилар билан тўлдирилган — Қонун ҳужжатлари маълумотлари миллий базаси, 08.01.2021 й., 09/21/1/0002-сон)