Microsoft Word togaymurod otamdan qolgan dalalar lotin ziyouz com doc

 

---

Tog‘ay Murod. Otamdan qolgan dalalar (roman) 
www.ziyouz.com
kutubxonasi 
52
17
Ayol bilan raisimiz oldin-ketin qaytib keldi. 
— Molodets, mash’al brigadir! — dedi ayol. — Partiya-hukumatimizga ana shunday quyoshda 
toblangan paxtakorlar kerak! 
— Qulluq, —dedim. 
— Bizga qanday xizmatlar bor? 
— Xizmat yo‘q. Bari nima to‘kin-sochin. 
— Ishlaringizga muvaffaqiyat tilayman! 
— Tag‘in bir qulluq. 
Ayol dalalarimni qaradi. Oqtuproq dalam ekuvsiz ekanini bilib qoldi. 
— Nega hozirgacha chigit ekilmagan? — dedi. Raisimiz qirinib yo‘taldi. Bayon etish uchun 
shaylandi. Yana-tag‘in menga qaradi — o‘zing ayt, degan bo‘ldi. 
Men nima deyin? 
Rahmatlik maktab direktorimizni qizginasi, chin, oqtuproq dalam ekuvsiz yotibdi, boisi — qurib-
qaqshab yotibdi, oppoq changib yotibdi, deyinmi? Oqtuproq dalam mirob marhamatini qarab yotibdi, 
deyinmi? 
Men miq etmayin qarab tura berdim. 
— Maza yo‘q-ku, mash’al brigadir? — dedi ayol. Endi nima deyin? 
O‘ynab qo‘yay, rahmatlik maktab direktorimizni qizginasi, o‘ynab qo‘yay, oqtuproq dalamga ayni 
shu holida chigit ekayin — chigitim unmaydi, deyinmi? Chigitim unsa-da, uch-to‘rt ko‘saklikkina 
nimjon g‘o‘za bo‘ladi, hosili bir terimdan ortmaydi, deyinmi? 
— Bu dalamiz oqtuproq dala... — dedim. O‘ynab qo‘yay, qaldirg‘och uya turmakkinangizdan 
o‘ynab qo‘yay, mirob oldin suv bersin, men oldin oqtuproq dalamni suvlayin, keyin toblayin — ana 
undan keyin ekayin, deyinmi? 
— O, tem bolee, oqtuproq! — dedi ayol. 
— Shunday, shunday, — dedim. 
— Oqtuproq yerga birinchi bo‘lib ekish kerak! Ekkanda ham tig‘iz ekish kerak! To‘g‘rimi, 
o‘rtoqlar? 
— Dono fikr! — dedi raisimiz. — Hikmatli gap!
Men nima deyishimni bilmadim - tilim aylanmay qoldi. 
Ayol o‘ng qo‘l oppoq qo‘lqopini sug‘urdi. Yerga qo‘l uzatdi. 
— Qani, ko‘raylik-chi, —dedi. 
Ayol bir siqim tuproq oldi. Yuzlari oldiga olib keldi. Sinchiklab tikildi. 
— O, mash’al brigadir! — dedi. — Bu yer emas asal, asal! Shunday asal yerni kuttirib o‘tiribsiz-a. 
Yaxshi emas, mash’al brigadir, yaxshi emas. 
— Ekamiz, ekamiz, — dedim. 
— Eking, kechiktirmay eking! Anavi turgan traktor chigit ekadimi? O‘shani tez buyoqqa olib 
keling! 
Men endi nima deyin? 
O‘ynab qo‘yay, qaldirg‘ochuya turmakkinangizdan o‘ynab qo‘yay, anavi oppoqqina kaftingizdagi 
yer emas, u bir chang, g‘o‘za changda ko‘karmaydi, g‘o‘za yerda ko‘karadi, deyinmi? 
Meni hamisha dalalarim qo‘llaydi, Meni hamisha dalalarim quvvatlaydi. Meni hamisha dalalarim 
yoqlaydi. 
Bu safar-da dalalarim qo‘lladi: ayol oqtuproqni tashlab edi — oqtuproq deyarli yerga tushmadi! 
Oq-tuproq changib-changib uchdi! 
Ayol bet burdi. Ayol bet o‘girdi. 
— Fu-u - deya kafti bilan chang quvdi. Raisimiz tirsagimdan chet tortdi. 

---

Tog‘ay Murod. Otamdan qolgan dalalar (roman) 
www.ziyouz.com
kutubxonasi 
53
— Choping, traktorni olib keling, — deya shivirladi. 
Men ketimga qarab-qarab yo‘l oldim. Men umidlanib-umidlanib yo‘l oldim. 
Ayol, mayli, qo‘ya bering, deydimikin, deya umidlandim. 
Traktordan sado chiqdi — ayoldan sado chiqmadi. 
Oqtuproq dalamga traktor soldim 
Ayol traktor ketidan mamnun-mamnun bosh irg‘ab qaradi.