Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
83
boshladim. 
Men oynaijahon qarab-qarab go‘sht maydaladim. 
Oynaijahon bor — raisimizda bor-da! Raisbop oynaijahon! Rangli-rangli oynaijahon! Qizilini qizil, 
ko‘kini ko‘k ko‘rsatgich oynaijahon! 
Maskovdan go‘zallar musobaqasi bo‘ldimi yo go‘zallar namoyishi bo‘ldimi, ishqilib — ajab bir 
sinoat bo‘ldi. 
O‘ng yoqdan bir go‘zal keldi, chap yoqdan bir go‘zal keldi — oynajahon go‘zalga to‘ldi! 
Sarvqad go‘zallar, chikkabel go‘zallar, sadaftish go‘zallar bo‘ldi! 
Go‘zallar kerila-kerila qadamladi. Go‘zallar irg‘ala-irg‘ala qadamladi. Go‘zallar sollana-sollana 
qadamladi. Go‘zallar nozlana-nozlana qadamladi. 
Ay, bir qizlar bo‘ldi, ay, bir qizlar bo‘ldi! Paxtaday oppoq qizlar bo‘ldi. Qosh-kiprigi qop-qora 
qizlar bo‘ldi. Lablari paxta guliday qip-qizil qizlar bo‘ldi. Aybi... yalang‘och qizlar bo‘ldi! 
Men mahliyo bo‘lib o‘tirdim-o‘tirdim... o‘z-o‘zimdan uyaldim. Yuzlarim qizidi. Yo‘q, lovv-lovv 
yondi. Ko‘zlarim pir-pir etdi. 
Men oynaijahondan ko‘zlarimni oldim. Boshimni qirt-qirt qashidim. Raisimizni ayoli qarayotgan 
bo‘lsa-ya, deya ko‘z qirim bilan oshxona taraf qaradim. 
Raisimizni ayoli qozoni bilan hamankara bo‘ldi. Duyum-duyum oynaijahon-da qarab-qarab qo‘ydi. 
Raisimizni ayoli mana munday demishday bo‘ldi: 
«Muncha ko‘zingni lo‘q etib qaraysan? Nima, umringda yalang‘och ayol ko‘rganing yo‘qmi?» 
Yuzlarim haminqadar lov-lovulladi.. 
Boshimni tag‘in-da quyi egdim. Dasturxon egdim, Dasturxon bukdim. 
Men mana munday demish bo‘ldim: 
«Men yalang‘och ayollarga qarayotganim yo‘q. Mana, dasturxon qarab o‘tiribman». 
Esi dardim esa... go‘zallarda bo‘ldi! Ko‘z ostimdan qarab-qarab oldim... 
Turk go‘zali bosayinmi-bosmayinmi, deya odimladi. Oqterak bel-oqterak bel oppoq sonlarini 
irg‘ab-irg‘ab odimladi... 
Men ich-ichimdan miriqdim. Men qilt-qilt yutindim... 
Tag‘in oshxona taraf ko‘z qirimni tashladim 
Raisimizni ayoli qozondan yuzini oldi. Oynaijahon qaradi. Bir ko‘zi qozonda bo‘ldi, bir ko‘zi 
oynaijahonda bo‘ldi. 
Raisimizni ayoli mana shunday demishday bo‘ldi! 
«Erkak bo‘lmay o‘l-a. Yalang‘och ayolga qaramay ko‘zing o‘yilsin-a». 
Men bir-ikki yo‘talib-yo‘talib oldim. Boshim uzra shig‘il-shig‘il pishib yotmish husayni uzumlarga 
bosh ko‘tarib qaradim. 
Bet-boshim uzumlarda bo‘ldi, ko‘z qirim go‘zallarda bo‘ldi. 
— Manavi husayni-ya, hamsoya? — dedim. 
— Husayni, nima edi? 
— Men jovuzmikin, debman... Men mana munday demish bo‘ldim: 
«Men yalang‘och ayollarga qarayotganim yo‘q. Mana, husayni uzumlarga qarab o‘tiribman». 
Aslida... bet-boshim uzumlarda bo‘ldi, ko‘z qirim go‘zallarda bo‘ldi. 
Badanlarim varaja-varaja etdi. 
Og‘zimdan suvim oqdi. 
16 
Kattalar bir mahalda keldi. 
Qo‘lyuvgichda qo‘l chaydi. Birin-ketin ichkariladi. 
Men ostonadan yeguliklar uzatib turdim. 

---

Tog‘ay Murod. Otamdan qolgan dalalar (roman) 
www.ziyouz.com
kutubxonasi 
84
Raisimiz qo‘shqo‘llab olib dasturxon qo‘yib turdi. 
Men ostonada turdim 
— Endi nima qilayin, rais bova? — dedim. Raisimiz eshik baldog‘idan ushladi. 
— Bo‘pti, endi qayta qoling, —dedi. —Erta dala borgich odamsiz. 
— Esa-chi, — dedim. — Dala bormay, qaer boraman.
Raisimiz eshikni ichidan yopdi.