Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
77
— Gulya, — deya, hamkasabasi taraf yurdi qiz. — Gulichka, uydan gollandskiy sir olib 
kelganman, obed qilmaymizmi? 
5 
Ostimda mototsikl, boshimda shlyapa — garmselday-garmselday yeldim. 
Shlyapamni oyna solib-oyna solib yeldim. 
Yoril-e, Dehqonqul-e, yoril-e, dedim. 
Bir-ikki chaqirim yeldim — shlyapamni oyna soldim. Tag‘in bir-ikki chaqirim yeldim — tag‘in 
shlyapamni oyna soldim. 
Rais bo‘lib ket-e. Dehqonqul-e, rais bo‘lib ket-e, dedim. 
Shunda xiyol o‘ylab qoldim. O‘zimni yer urmishday bo‘ldim. Past ketmishday bo‘ldim. 
Chin-da, rais kim bo‘pti? Shlyapsi bo‘lgan bilan... mototsikli yo‘q! Davlatni mashinasiga kuni 
qolgan. 
Unda... raykom bo‘lib ket-e, dedim. Shunda, o‘zimni o‘zim bilmishday bo‘ldim. 
Rais bilan raykom o‘rtasi bo‘lib ket-e, dedim. 
 
6
Uyda shlyapa kiyib oynaijahon ko‘rdim. 
Oynaijahonda AQSh prezidenti shlyapasini yer olib qo‘ydi. 
Siz-da, shlyapangizni oling. Dehqonqulboy, dedim. 
Men shlyapamni olib qo‘ydim. 
AQSh prezidenti shlyapasini kiydi. 
Shlyapangizni kiying. Dehqonqulboy, dedim. 
Men-da shlyapamni kiydim. 
AQSh prezidenti shlyapasini men taraf silkitdi. 
Men-da shlyapamni oynaijahon taraf silkidim. 
AQSh prezidenti shlyapasini boshiga qo‘ndirdi. Samolyotga kirib ketdi. 
Men-da shlyapamni boshimga qo‘ndirdim. Bolish yonboshladim. 
Hurillatib-hurillatib choy ichdim. 
Ay, shlyapangizni qirquvidan-da, Dehqonqulboy, shlyapangizni qlrquvidan-da, dedim. 
Ammo....bosh kiyim ko‘rdim — shlyapaday beqillig‘ini ko‘rmadim! 
Kallamni qashilayin deya qo‘l uzatdim — qo‘lim o‘z-o‘zidan shlyapa qirquviga tegib ketdi. 
Shlyapa yer tegib-tegmay yumalab-yumalab jo‘nadi. Uy burchagiga borib to‘xtadi. 
Men o‘rmalab borib shlyapamni olib keldim. 
Tag‘in shlyapa kiyib choy ichdim. Qo‘lim tag‘in shlyapa qirquviga tegib ketdi. 
Shlyapa yumalab-yumalab jo‘nadi. 
O‘ynab qo‘yay, sendaychikin bosh kiyimdan, o‘ynab qo‘yay, dedim. 
Bosh kiyim bo‘lsa — kiroyi telpakday bo‘lsa-da. Telpak vazmin-vazmin, sobit-sobit bosh kiyim. 
Telpak tap etib yer tushdimi, bo‘ldi — joyida qimir etmay tura beradi. Shlyapadayin yumalab, 
odamni o‘rmalatib yurmaydi. 
Shlyapam yer tushib, burchak yumalashini qo‘ymadi — men ushlab kelib, kallamga qo‘ndirishimni 
qo‘ymadim. 
Men tevarakka kami bilan raisona-raisona, ko‘pi bilan raykomona-raykomona qaradim.