Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
120
— Tinchlik, osoyishtalik. 
— Mabodo kayfing yo‘qmi? 
— Umrimda og‘zimga olmaganman, Qayum aka. Nima edi? 
— Bozorligingni ko‘rib aytaman-da. Kayfi yo‘q odam ham shunday bozorlik qiladimi? 
— Dasturxonni obodi-da, Qayum aka. 
— Dasturxon obodi uchun ol, evi bilan ol-da. Bundayin bozorlik uchun mendayin dehqon bir oy 
terlaydi! 
— O‘zimdayin dehqon-da shu, Qayum aka, o‘zimizdayin dehqon-da shu. 
— Manavi pistami? O‘n besh so‘m-a? Y
O
,
pirim-e, yo, pirim-e! Narx-navoni Xudo urmadi — men 
qutulmadim! Hali shu yaqinda pista chaqqanimni eslay olmayman. Shu qishdagi bir to‘yda besh-oltita 
chaqib edimmi, bilmayman. 
— Siz shu qishda chaqibsiz ekan, men qachon pista chaqqanimniyam bilmayman. Endi, mehmon 
atoyi xudo, Qayum aka. O‘zbakchilik — o‘zbakchilik. 
— O‘lma! Shu gapdan qolma, Dehqonqul, kam bo‘lmaysan! 
— Shu tevarakni mehmoni bo‘lsa go‘rga edi. Moskovdan mehmon kelayapti, Maskovdan. Bari 
nozik mehmon. Raisimiz aytdi. 
— Mehmon kelgan uydan baraka arimaydi, Dehqonqul, baraka arimaydi. Mehmon rizqi o‘zidan 
oldin keladi, deydi. Maskovchi mehmon bo‘lsa, unda, bunday qil: bozorga xurmo kiribdi. Hay, anavi 
yerda sotayapti, hayla! 
— Qani-qani? 
— Hayla-hayla, qozonshlyapa savdolashayapti. Ana shu xurmodan bir-ikki kilo ol. Maskov 
yoqlarda xurmo o‘smaydi. Mehmon osh deb kelmaydi. Mehmon mehmon-da — havasaki yeydi-da. 
Qayum qorovul aytmish qator-qator xurmolar oldilab bordim. 
— Xurmo qanchadan bo‘ldi? — dedim. 
— Uch so‘mdan, — dedi. Xurmolarni ushlab-ushlab ko‘rdim. 
— Xurmo qaerniki? — dedim. 
— Subtropikniki, — dedi. 
— Suptropiknikidan bir kilo torting qani. Subtropik bog‘ shunday oldimizda. Dalamizdan yigirma 
chaqirim keladi, 
Bozor darvoza oldidan ikki cho‘ntak maydapista oldim. 
17
To‘lib-toshib uy keldim. Bozorligimni oshxona qo‘ydim. Bolalar bozorlik yopirildi. Bolalar 
bozorlik girdini oldi. 
— Olma, ota, olma! 
— Ota, anor bering! 
— Uzum bering, uzum! 
Birovi olmaga qo‘l uzatdi. Birovi anorga qo‘l uzatdi. Birovi uzumga qo‘l uzatdi. 
Bolalarni qo‘lini urib-urib tashladim. 
— Tort qo‘lingni, tort! — dedim. 
Bolalar ketiga qo‘l bekitdi. Bolalar qo‘ltig‘iga qo‘l tiqdi. Bolalar og‘ziga qo‘l soldi. 
Bolalar mo‘lt-mo‘lt qaradi. Bolalar iltijo-iltijo qaradi. 
Men boshim bilan bozorlikka imo berdim. 
— Bularni yeb bo‘lmaydi, q-ha! — dedim. — Ha, q-ha, q-ha! 
Men aft burishtirdim. Men bosh sarak-sarak etdim. 
— Ichni og‘ritadi, q-ha! Ichni ketkizadi, q-ha! — dedim. — Qara, puf-e, sassiq uzum ekan, puf-e! 
— Menga nima olib keldingiz, ota? 

---

Tog‘ay Murod. Otamdan qolgan dalalar (roman)