Microsoft Word togaymurod otamdan qolgan dalalar lotin ziyouz com doc

 
 
SAKKIZINCHI BOB
 
1
G‘o‘zalarim ost-ostlaridan ochildi. 
G‘o‘za nima uchun yerdan chiqmish bo‘g‘zi oldidan ochiladi? 
G‘o‘za yer oziq-quvvatini g‘o‘zauchlab-g‘o‘zauchlab tortadi. G‘o‘za yer quvvai qudratini 
quyoshlab-quyoshlab ko‘taradi. 

---

Tog‘ay Murod. Otamdan qolgan dalalar (roman) 
www.ziyouz.com
kutubxonasi 
116
Oqibat — g‘o‘za ost-ost shoxlari oziqsiz qoladi. G‘o‘za ost-ost shoxlari quvvatsiz qoladi. 
Oxir-oqibat — g‘o‘za aynan ana shu ost-ost shoxidan ochiladi. Mayda-mayda ochiladi. G‘ozsiz-
g‘ozsiz ochiladi. 
2
G‘o‘zalarim uch-uchlaridan ochildi. 
G‘o‘zauch paxtalar-da ostshox paxtalarday bebarokat-bebarokat laxta bo‘ladi. 
G‘o‘zauch paxtalar-da ostshox paxtalarday bebaror-bebaror paxta bo‘ladi. 
Boisi — qoqbel ko‘saklar uch-uch ko‘saklarga oz-oz yer oziq qiyadi. Qoqbel ko‘saklar uch-uch 
ko‘saklarga kam-kam yer quvvat qiyadi. 
 
3 
G‘o‘zalarim qoq belidan-qoq belidan ochildi. 
Qoqbel ko‘sak yerda bor oziq-quvvatni tortib oladi. Qoqbel ko‘sak yerda bor kuch-qurbni o‘zida 
olib qoladi. 
Shu boisdan qoqbel ko‘sak paxtamisan-paxta bo‘ladi! 
Qoqbel ko‘sak barorli-barorli paxta bo‘ladi. Qoqbel ko‘sak tarozi bosajak-tarozi paxta bo‘ladi. 
Dehqon kuniga-da ana shu qoqbel ko‘sak yaraydi! Shu boisdan-da, qoqbel ko‘sakni dehqonko‘sak, 
deydilar! 
4
G‘o‘zabarg sariq-sariq bo‘lsa, dori risoladagiday barg to‘kmaydi. 
G‘o‘zabarg quruq-quruq bo‘lsa, dori binoyiday barg to‘kmaydi. 
Shu bois, mirobdan suv so‘radim. 
— Oqar suv tamom bo‘ldi, — dedi mirob. — Endi, suv ombordan suv beraman-da. 
Suv omborda suv yillab ko‘llab-ko‘llab yotadi. Yil mobaynida loyqa suv ostilab cho‘kib-cho‘kib 
qoladi. 
Suvni suv etgich ana shu loyqa bo‘ladi. 
Ana shu loyqasiz suv bilan sug‘orilgich g‘o‘za yigirma kun hayallaydi. 
Ana shu loyqasiz suv bilan sug‘orilgich hosil o‘ttiz-qirq foiz kamayadi. 
G‘o‘zalarim u davrdan o‘tdi — g‘o‘zalarimga endi oti suv bo‘lsa bo‘ldi. 
Men dalalarimni omborsuv bilan oqar-oqmas suvlab oldim.