Microsoft Word Mineral va petro lat doc

Malaxit – Cu₂[CO₃](OH)₂. Yunoncha «malaxe» gulxayri demakdir. Shu o‘simlik rangiga o‘xshashligi uchun nom berilgan bo‘lsa kerak. Tarkibida – CuO – 71,9 %, CO₂ – 19,9 %, H₂O – 8,2 % miqdorida aniqlangan. U monoklinal singoniyali. Tabiatda buyraksimon (34rasm), radial shu’la kabi tuzilgan; ba’zan oqiq shakldagi massa holida ham uchraydi. Ba’zan konsentrik zonal tuzilishda bo‘ladi. Malaxit yashil rangli, yaltirashi shishadek, olmosdek, ba’zan tolasimonlari ipakdek. Uning qattiqligi 3,5–4, solishtirma og‘irligi 4, ulanish tekisligi mukammal. Malaxit mis sulfid konlarining oksidlanish zonalarida uchraydi.



34-rasm. Malaxitning buyraksimon agregati.

Malaxit bilan yo‘ldosh mineral sifatida azurit, xrizokolla, tenorit, kuprit, sof mis va boshqalar bilan birga paragenetik assotsiatsiya hosil qiladi. Malaxit bezak buyumlar tayyorlashda ishlatiladi.

Azurit – Cu₃[CO₃]₂ (OH)₂. Nomi fransuzcha; «azure» havo rang demakdir. Tarkibida – CuO – 69,2 %, CO₂ – 25,6 %, H₂O – 5,2% bo‘ladi. U monoklinal singoniyali, tabiatda kalta ustuncha yoki prizma, qalin tabletkasimon shakllarda topilgan. Azuritning rangi to‘q ko‘k, havo rang, yaltirashi shisha kabi. Uning qattiqligi 4, solishtirma og‘irligi 3,9; ulanish tekisligi mukammal emas. U sulfid konlarining oksidlanish zonalarida yuzaga keladi.

Azurit va malaxit odatda birga uchrashadi. Ammo miqdori bo‘yicha malaxit keng tarqalgan.