Меҳрибон ва раҳмли Аллоҳ номи билан !

Асал, ёнғоқ ва бодом ҳақидаги фасл
Асал, ёнғоқ, бодом ва шу каби маҳсулотлар борасида, асалдан агар у ушр солиғи олинадиган ерда бўлса, ушр солиғи олинади, агар харож солиғи олинадиган ерда бўлса, ҳеч қандай солиқ олинмайди. Агар чўл ва тоғдаги дарахтлар, ғорларда бўлса ҳеч нарса олинмайди, чунки бу ҳолда асал мева қаторида бўлади. Тоғ ва водийлардаги мевалардан харож солиғи ҳам, ушр солиғи ҳам олинмайди.
155. Абу Юсуф айтади: баъзи машойихларимиз Амр ибн Шуъайбдан ривоят қиладилар: Тоифнинг амири Умар ибн Хаттобга (р.а.): “Асалари эгалари Пайғамбарга (с.а.в.) берадиган солиқларини бизларга бермай қўйдилар, шунингдек, биздан уларнинг водийларини ҳимоя қилишимизни сўраяптилар. Мана шу маслада ўз фикрингизни билдирсангиз”, деб мактуб юборди. Умар унга жавобан: “Агар Пайғамбарга (с.а.в.) тўлаган солиқларини сизларга тўласалар, уларнинг водийларини ҳимоя қилинглар, агар тўламасалар, сизлар ҳам уларнинг водийларини ҳимоя қилманглар. Пайғамбарга (с.а.в.) ҳар ўнта мешдан биттасини берар эдилар”, деб мактуб ёзди.
156. Абу Юсуф айтади: Яҳё ибн Саъид Амр ибн Шуъайбдан ривоят қилади: Умар асалари уялари борасида: “Ҳар ўнта мешдан биттаси берилади”, деб ёзди.
157. Абу Юсуф айтади: Ал-Аҳвас ибн Ҳаким отасидан ривоят қилади: “Ҳар ўн ратлдан бир ратл берилади”.
158. Абу Юсуф айтади: Абдуллоҳ ибн ал-Миҳрор аз-Зуҳрийдан ривоят қилади: Расулуллоҳ (с.а.в.): “Асалдан ушр солиғи олинади. Лекин бодом, ёнғоқ, ўрмон ёнғоғи, писта ва шунга ўхшаш нарсалардан ушр солиғи олинадиган ерда бўлса ушр солиғи, харож солиғи олинадиган ерда бўлса харож солиғи олинади, чунки улар тортиб ўлчанади”, дедилар.
Абу Юсуф айтади: “Қамиш, ўтин, ҳашак, сомон ва шох-шаббалардан (العسف) ушр солиғи, бешдан бир улуш ва харож солиғи олинмайди. Лекин ... қамишдан (ситник) ушр олинадиган ерда бўлса ушр солиғи, харож солиғи олинадиган ерда бўлса харож солиғи олинади. Шакарқамиш ушр олинадиган ерда бўлса ушр солиғи, харож солиғи олинадиган ерда бўлса харож солиғи олинади, сабаби у истеъмол қилинади. ... қамиш истеъмол қилинмаса ҳам, унинг қиймати юқори ва фойдали ҳисобланади.
Агар ерда нефт, минерал смола, симоб, мўмиё каби маъданларнинг борлиги аниқланса, ушр солиғи олинадиган ерда бўладими ёки харож солиғи олинадиган ерда, улардан қандай солиқ олиниши бизга номаълум.