Mebel dizayni uchun zamonaviy materiallar

Tabiiy va sun’iy teri. Mebel uchun tabiiy teri bugungi kunda ushbu sanoatda qo'llaniladigan eng nufuzli material turidir. Ko'p asrlik foydalanish tarixi davomida u o'z mashhurligini umuman yo'qotmadi. Tabiiy teridan ishlangan mebellar viqor va hashamatni ifoda etadi, shu sababli ham boy xonadonlarning interyerlarida bu mahsulotdan ishlangan mebellar ularning ajralmas elementi hisoblanadi. Tabiiy teridan ishlangan mebellarning narxi ham albatta qimmat bo’ladi, buni hammaning ham cho’ntagi ko’tara olmaydi. Shu sababli ham bugungi kunda zamonaviy ishlab chiqaruvchilar uni o’rnini bosadigan sun’iy teri mahsulotlarini ishlab chiqarishmoqda.
Odatda mehmonxona divan va kreslolari, ofis xonalari uchun kreslolar teri mahsulotidan ishlanadi. Bu materialdan ishlangan mebellar interyerni bashang, hashamatli va qimmatbaho qilib ko’rsatadi. Shu sababli ham bunday mebellar qo’llanilgan interyerlar egasining yuqori martabali inson ekanligini ham ko’rsatadi.
To'qimachilik mahsulotlari (tekstil). Mebel ishlab chiqarish jarayonida to’qimachilik mahsulotlari yumshoq mebellarning ustki qoplamasi uchun ishlatiladi. Mebel uchun matolar tabiiy, sintetik yoki aralash tarkibli bo’ladi. Bugungi kunda mebel uchun matolarning o’n minglab turlari mavjud bo’lib, ularning barchasi tarkibi, rangi, tuzilishi, gipoallergenligi, suv o’tkazmasligi va qo’shimcha boshqa xususiyatlarining mavjudligi bilan farqlanadi.
Xulosa
Shunday qilib, bugungi kunda insonlar interyerini o’z dididagidek qilib zamonaviy, qulay, ixcham, go’zal va mablag’ jihatidan ham o’z xamyonibop mebellar bilan bezashi uchun mebel ishlab chiqarish sanoatida materiallar tanlash imkoni yetarlicha katta. Bu xom ashyolar maqsadi va vazifasi jihatidan ko'plab turli xil materiallarga bo’linadi.
Mebel ishlab chiqarish sanoatida qo'llaniladigan barcha materiallarning umumiy ro'yxatida birinchi o'rinlardan birini yog'och va uning chiqindilaridan tayyorlanadigan xom ashyolar (MDF, DSP, DVP, Faner) egallaydi. Ularni ishlab chiqarish uchun asosiy xom ashyo yog'och hisoblanadi.
Xonalarning vazifasiga qarab to’g’ri tanlangan xom ashyodan ishlab chiqarilgan mebel vazifasi jihatidan uzoq yillar xizmat qilishi uchun qo’llanilish sohasiga qarab to’g’ri parvarish qilinishi kerak.


Foydalanilgan adabiyotlar

1. 
   Daminova U., Komiljonov M. “Ergonomika i dizayn mebeli”, (II qism) O’quv qo’llanma, Toshkent, 2020 .
   
2. 
   O’zbekiston milliy ensiklopediyasi.
   
3. 
   Karimov, E. B., and D. E. Karimova. "Distinctive Features of Modern Styles in Interior Design." International Journal on Integrated Education 4.11 (2021): 21-24.