Mebel dizayni uchun zamonaviy materiallar

Mebel dizayni uchun zamonaviy materiallar
Karimova Dilnoza Erkinovna
Samarqand davlat arxitektura-qurilish instituti, stajor o’qituvchi


Annotatsiya: Qulaylik, ixchamlik, go’zallik kabi tushunchalar bugungi kunda hayotimizdagi tez-tez ishlatiladigan terminlarga aylandi. Biz qulay to’shakda uxlashga, ixcham bo’lgan javonlarda kiyimlarimizni saqlashga, yashab turgan interyerlarimizni mebellar bilan yanada boyitib go’zal qilishga odatlanganmiz. Bugungi kunda ushbu sifatlarni o’zida jamlagan mebellarni ishlab chiqish uchun maxsus xom ashyolar qo’llaniladi. Har bir turdagi xom ashyo o’ziga xos xususiyatlarga ega. Ushbu maqolada biz mebel ishlab chiqarish uchun ishlatiladigan asosiy xom ashyolar, ularning qisqacha tavsifi haqida to’xtalib o’tamiz.
Kalit so’zlar: Mebel, xom ashyo, yog’och, yog’och chiqindilari, MDF, DSP, DVP, faner.


Kirish qismi
Turar joy va jamoat binolarining interyerlari uchun eng muhim elementlardan biri mebel hisoblanadi. U inson yashash va ishlash muhitini shakllantiradi, muhitning estetik, badiiy ko’rinishini boyitadi.
Mebel uchun asosiy talablar uning sifat xususiyatlari bilan belgilanadi. Sifat deganda mahsulotning maqsadga muvofiq ma'lum ehtiyojlarni qondiradigan xususiyatlar to'plami tushuniladi. Sifatni baholash mahsulotning iste’mol xossalarini, ularning konstruksiyalarini, qo‘llaniladigan materiallarni, ishlab chiqarish texnologiyasini, mahsulotning inson va atrof-muhit bilan aloqasini har tomonlama tahlil qilishga asoslanadi. Ushbu tahlil natijasida mahsulotlarga qo'yiladigan talablar belgilanadi, bu esa ularni yanada takomillashtirish uchun asos bo'lib xizmat qiladi.
Ilk mebellarning yaratilish tarixiga nazar soladigan bo’lsak ular faqatgina yog’och xom ashyosidan yasalgan bo’lgan. Lekin zamonlar rivojlanishi natijasida bugungi kunda mebel ishlab chiqarish sanoatida nafaqat yog’och materialidan balki turli xil metall qotishmalardan, plastikdan, shishadan, qayta ishlangan yog’och chiqindilari (MDF, DSP,DVP, fanera) dan, rotangdan, tabiiy va sun’iy teridan, to’qimachilik mahsulotlaridan ham foydalangan holda mebel ishlab chiqarilmoqda.
Maqolada yuqorida sanab o’tilgan, mebel ishlab chiqarish sanoatida ishlatiladigan xom ashyolar haqida qisqacha to’xtalib o’tamiz.