Mazkur ishchi o‘quv dasturi Bioinjeneriya va oziq-ovqat xavfsizligi fakulteti Kengashining 2020 yil " " dagi yig‘ilishida muhokama qilinib, tasdiqlash uchun tavsiya etilgan.

Ekish tartibi. Kamroq miqdordagi urug’lar qo’lda, ko’p miqdordagi urug’lar esa mexanizatsiya yordamida ekiladi. Stratifikatsiyalangan urug’larni ekishdan oldin qumdan yaxshilab tozalanadi. Qo’lda ekilganda esa urug’lar markyor yoki ip bilan reja chizig’i olingan egatlarga qumi bilan birga ekiladi.
Bahorda yaxshi nishlagan urug’lar ekiladigan kuni namlanadi va oldindan rejalab olingan egatlarga qo’lda ekiladi. Urug’lar yumshoq tuproqqa sekin tashlab ustiga nam tuproq tortiladi. Ekish tugagandan keyin oldindan tayyorlab qo’yilgan egatlardan suv beriladi. Kuzda olma, nok, antipka, olchaning quruq urug’lari ekiladi.
Payvandtaglarni parvarish qilish
Payvandtaglar o’tqazilgandan keyin qator oralari chuqur kultivatsiya qilinadi. Kultivatsiya DT-20, DT-28, «Belarus» markali va boshqa traktorlarga osilgan KRN-4,2 KRN-2,8A, KON-2,8, KSV-25, NKU-4,6 markali osma kultivatorlar bilan bajariladi. Kichik maydonchalarda ishlar asosan qo’lda bajariladi ot qo’shiladigan KOKS-0,7 markali kultivatordan foydalaniladi. Urug’ ko’chat ko’chatzorida yerni ishlash va begona o’tlarga qarshi kurash olib borish ham payvandtag ko’chatzoridagi xuddi shunday ishlardan deyarli farq qilmaydi. Qatorlardagi yerlar vegetatsiya davrida kamida uch marta yumshatiladi. Birinchi marta bahorda ko’chat o’tqazilgandan keyin bir-bir yarim oy o’tgach, ikkinchi marta kurtak payvand qilish oldidan va uchinchi marta qish oldidan noyabr oyida yumshatiladi. Sug’orish texnikasi, muddatlari va me’yori payvandtag ko’chatzoridagidan kam farq qiladi. Kurtak payvand qilishdan besh-etti kun oldin urug’ ko’chatlar mo’l-ko’l qilib sug’oriladi. Bu esa, shira harakatini yaxshilaydi va kurtak payvand qilganda po’stloq oson ko’chadi. Shuningdek, kurtak payvand qilingandan keyin ham kurtaklar yaxshi tutib ketishi uchun dala darhol sug’oriladi. Dalada ishlashdan maqsad — payvandtaglarning yaxshi o’sishini ta’minlashdir. Qatorlar va qator oralaridagi yer doimo yumshatilgan va begona o’tlardan tozalangan bo’lishi kerak.