Мавзу: Педагогнинг компетентлик қобилияти асослари

Хусусий дидактика – муайян ўқув фанларини ўқитиш қонуниятлари, усуллари, воситалари, шакллари ва йўлларини ўргатувчи методика (тадрис) фанлари ҳам педагогика фанлари туркумининг асосий соҳаларидан бири бўлиб ҳисобланади. У умумий дидактика ютуқлари асосида ривожланади ва унинг назарий умумлашмаларига асосланган ҳолдагина такомиллашиб боради. Муайян бир фанга тадбиқ этилган дидактик қонуниятлар, ўша предметнинг умумий жиҳатларини қонунлаштиради ва уларда ўқитишнинг универсал жиҳатлари намоён бўлади.
Дидактиканинг бошқа фанлар билан боғлиқлиги. Таълим жараёни жамият ривожланишининг ижтимоий, иқтисодий ва сиёсий шарт-шароитлари, одамлар фаолияти ва ҳаётий эҳтиёжлари, замонавий фан-техника тараққиётининг ютуқларига ҳамма таълим олувчиларнинг шахсий сифатларига қўйилган катта талабларга асосланади.
Дидактика соҳасидаги натижалар унинг олдига янги-янги масалаларни кўндаланг қўяди. Бу муаммоларни ҳал қилиш бошқа фан ютуқларидан максимал даражада самарали фойдаланишни талаб этади.
Фалсафа ва социология жамият ва атроф-муҳит ривожининг умумий қонуниятлари ҳақидаги фанлар сифатида одамларнинг ҳаёти ва фаолиятининг ижтимоий ва бошқа ўзига хос хусусиятларини хисобга олишда дидактикага ёрдам беради.
Сиёсатшунослик таълимдаги сиёсий ҳодисалар ва жараёнлар билан боғлиқ дидактик масалаларни очиш учун хизмат қилади.
Этнология дидактикага одамларнинг миллий ўзига хосликларини тўғри ҳисобга олишда ёрдам беради, қайсики таълимда миллий тажрибалар ўзига хос хусусиятга эга.
Педагогик психология таълим жараёнида билим, кўникма ва малакаларни эгаллаш жараёнининг психологик қонуниятлари ва тамойилларини ҳисобга олишга имконият беради.
Одам физиологияси таълим жараёнида одам тана тузилиши ва нерв тизимининг ишлаш қонуниятларининг ўзига хос хусусиятлари, уларнинг роли, аҳамияти ва ўзига хос вазифаларни кўрсатишга ёрдам беради.
Хусусий методика алоҳида предметларни ўқитишда таълимнинг турли шакл ва воситаларини қўлланишининг ўзига хосликларини аниқ ҳисобга олишда дидактикага ёрдам беради.