Mavzu: O‘zbekistonda milliy siyosat (XX asr 80-yillar misolida)

XULOSA
O‘zbekistonda milliy siyosat (XX asr 80-yillar misolida) mavzusini tadqiq etib, o’rganib quyidagi xulosalarga kelindi:

Birinchidan, O‘zbekistan mustaqillikni qo‘lga kiritgan davrdan boshlab yangicha ijtimoiy-iqtisodiy munosabatlarni shakllantirish va rivojlantirish, milliy davlatchilikni, uning siyosiy va huquqiy asoslarini mustahkamlash, komil insonni tarbiyalash borasidagi tarixiy an’analar va qadriyatlarni tiklash, jahondagi rivojlangan va rivojlanayotgan demokratik davlatlarning tajribasini o‘rgaiish, ularni yangi davr ehtiyojlari, respublikamizdagi sharoitlar, xalqimizning mentaliteti bilan bog‘lab, ijodiy rivojlantirishdan iborat taraqqiyot yo‘lini tanlab oldi;

Ikkinchidan, Mustaqillikning o‘tgan qisqa davrida o‘zbek xalqi ozod va obod Vatan, kelajak istiqboli erkin va demokratik jamiyat qurish bo‘lgan yurt egasiga aylandi. Vatanparvarlik va milliy g‘urur kishilar ma’naviy kamolotining asosiy mezonlaridan biri bo‘lib qoldi;

Uchinchidan, KPSS va sovet davlatining 74 yillik mustabid hukmronligi davrida o‘zbek xalqiga xos qadriyatlar poymol etildi, xalq hayotiga zo‘ravonlik bilan singdirilgan «sotsialistik» turmush tarzi millatlar va elatlarning o‘zligidan mahrum bo‘la boshlashiga, ijtimoiy-iqtisodiy hayotda nohaqlikning yuzaga kelishiga sabab bo‘ldi;

To’rtinchidan, iqtisod va xo‘jalik hayotida vujudga kelgan holat, ya’ni markazdan turib ma’muriy-buyruqbozlik usulida boshqarish, ekstensiv rivojlanish yo‘lining tanlab olinishi mamlakatni tanazzul yoqasiga olib keldi;

Beshinchidan, inqiroziy jarayonlarning asosida mavjud siyosiy tuzum, iqtisodiy munosabatlarning deformatsiyasi, ishlab chiqarishni tashkil etishning ma’muriy-buyruqbozlik usullari, mehnatni tashkil etishda manfaatdorlik omillariga e’tibor berilmaganligi, kishilarning manfaati va individual iste’dodi hisobga olinmasligi, buning natijasida kishilarda mulkka, mehnat qurollari va mahsulotga befarqlikning o‘sib borishi yotardi. Milliy o‘lka xalqlari aslida sovetlar imperiyasining ishlab chiqaruvchi kuchlar yetkazib beruvchi hamda Markazning xom ashyo bazasiga aylantirildi;

Oltunchidan, sovet mamlakati davlat boshqaruvining partiyaviy, sinfiy diktatura qonunqoidalariga asoslangan mezonlari, shovinistik munosabat, buyuk davlatchilik g‘oyalari mazkur davr milliy siyosatining asosiy tamoyillari edi. Shubhasiz, yuqoridagi tamoyillar, o‘z navbatida, o‘sib kelayotgan yosh avlodning e’tiqodi, dunyoqarashi, aqliy ongi shakllanishiga ma’lum darajada ta’sir etdi. Bu esa «katta og‘a» deb nom olgan xalqlar tili, madaniyati, tarixiga taqlidning kuchayishiga sabab bo‘ldi;

Yettinchidan, XX asr 80-yillari o‘rtalaridan M. S. Gorbachyov tashabbusi bilan boshlangan «qayta qurish» va «oshkoralik» siyosati butun mamlakatda milliy manfaatlarny himoya qilish, o‘zlikni anglashga bo‘lgan harakatlarning kucha yishiga, milliy va diniy qadriyatlarni tiklashga qaratilgan harakatlar boshlanib ketishiga turtki bo‘ldi;