Mavzu: Mustaqillik va ona tili haqida suhbat

4-sinf
04.09.2016 1-dars
Mavzu: Mustaqillik va ona tili haqida suhbat.
Maqsadlar:
ta’limiy: o‘quvchilarga Istiqlol — oliy ne’matligi, mustaqillik davrida bizga berilgan imkoniyatlar, yurtga munosib farzand bo‘lish insoniy burchimiz ekani haqida bilim va tushuncha berish;
tarbiyaviy: Vatanparvarlik, mas’uliyatni his qilish, mardlik, hamjihatlik, ma’naviy jasorat, fidoyilik kabi ezgu fazilatlarni kamol toptirish;
rivojlantiruvchi: mustaqil va mantiqiy fikrlashga o‘rgatish, o‘quvchilar dunyoqarashini kengaytirish.
Dars turi: yangi bilim beruvchi va mustahkamlovchi.
Dars shakli: kichik guruhlarda ishlash.
Dars metodi: suhbat, savol-javob, «Mustaqillik boshqotirmasi», «Ikki yorti — bir butun», «Ma’naviy jasorat», «Dillarda Vatan madhi» loyihalari.
Jihozlar: «Yagonasan, muqaddas Vatanim, sevgi va sadoqatim senga baxshida, go‘zal O‘zbekistonim!» shiori yozilgan plakat, Prezidentimiz asarlari, davlat ramzlari, bunyodkorlik ishlari aks etgan slaydlar, yoshlarimizning erishgan yutuqlari jamlangan videorolik va rasmlar.
Darsning borishi
Tashkiliy qism.
A) salomlashish, davomatni aniqlash.
B) o‘quvchilarni darsga tayyorlash.
O‘qituvchi: — Hurmatli bilimga chanqoq, tirishqoq, qalbi toza o‘g‘il-qizlar. Avvalambor, men sizlarni yozgi ta’tilni maroq bilan o‘tkazib, sog‘-salomat maktab ostonasiga qadam qo‘yganingiz bilan tabriklayman! 1991- yildan boshlab 1- sen­tabr O‘zbekiston Respublikasining Mustaqillik kuni sifatida bayram qilinadi. Bugun xalqimiz asrlar davomida orziqib, intiqib kutgan, hayotimizning ma’no-mazmuni, ong-u shuurimizni tubdan o‘zgartirgan, barchamiz uchun eng ulug‘ va eng aziz bayram — Mustaqillik kunining 24 yilligini tantanali nishonlamoqda. Bayramni ko‘tarinki ruhda o‘tkazgan minglab bolalar yangi o‘quv yilini boshlaydilar. Biz ham ushbu kunni baland ruh va katta xursandchilik bilan nishonlab, birinchi qo‘ng‘iroq sadolari ostida ilk darsimizni boshlaymiz. Birinchi darsimiz — Mustaqillik darsi.