Мавзу: Корхоналар банкротлигини олдини олиш ва уни со¨ломлаштириш й¤налишлари

XULOSA

Bitiruv malakaviy ishni yozish davomida biz tomonimizdan qo’yidagi xulosa va amaliy tavsiyalar tizimi ishlab chiqildi.

Birinchidan, korxonalari moliya-xo’jalik faoliyatining tugatilishiga ularning iqtisodiy tabiatidan kelib chiquvchi quyidagi ob’ektiv omillar ham ahamiyatli ta’sir ko’rsatishi aniqlandi: tadbirkorlik sub’ektlarining moliyaviy- xo’jalik faoliyatidagi tavakkalchilikning yuqori darajasi; tadbirkorlik sub’ektlari faoliyatini bozor kon’yunkturasiga bog’liqligining kuchliligi; korxonalarda xo’jalik mablag’larining hajm jihatdan ahamiyatsizligi; maxsus, ixtisoslashgan boshqaruv tuzilmasining mavjud emasligi; odatda raqobat kuchli bo’lgan soha va tarmoqlarda faoliyat ko’rsatishi; moliyaviy jihatdan imkoniyatlarining cheklanganligi hisoblanadi.
Ikkinchidan, korxonalar faoliyatlarining tugatilishiga olib keluvchi
sub’ektiv omillarni shartli ravishda quyidagi 4 guruhga ajratildi:

1. 
   shaxsiy-ruhiy omillar, ya’ni tadbirkorlik faoliyati bo’yicha etarli bilim va malakaga ega bo’lmaslik; muassislarning korxonadagi ishning borishidan qoniqmasligi.
   
2. 
   tashkiliy omillar, ya’ni korxonani tashkil etishdan ko’zlangan maqsadga erishib bo’lish; diversifikatsiyalashgan kompaniya ishining mazkur yo’nalishini to’xtatish istagi; boshqa xo’jalik jamiyatiga qo’shilish yoki birlashib ketish.
   
3. 
   me’yoriy-huquqiy omillar, ya’ni korxona tashkil qilingan muddatining tugashi; sud tomonidan korxonaning ro’yxatga olinishini asossiz deb topilishi; faoliyatning zarur ruxsatsiz (litsenziyasiz) olib borilishi; qonun tomonidan ta’qiqlangan faoliyatning yuritilishi; qonun yoki boshqa huquqiy qoidalarning bir necha marta yoki qo’pol ravishda buzilishi.
   
4. 
   iqtisodiy omillar, ya’ni korxonaning iqtisodiy nochorlik (bankrotlik) holatiga tushishi; faoliyat foydaliligi darajasining pastligi; to’lanayotgan dividendlarning etarli darajada bo’lmasligi.
   

Uchinchidan, moliya-xo’jalik faoliyatini yuritmayotgan korxonalarni tugatishda korxona egalari yoki muassislarini bu harakatga undovchi sabablar o’rganilib, ularning sof iqtisodiy va ma’naviy-ruhiy jihatlarni ajratib ko’rsatildi.Korxona faoliyatini o’z vaqtida tugatishga undovchi iqtisodiy ahamiyatdagi sabablar tarkibiga faoliyat ko’rsatmagan chog’da ham vujudga keluvchi xarajatlarning oldini olish, korxona mulkini saqlab qolish; ma’naviy- ruhiy ahamiyatdagi sabablar tarkibiga tadbirkorning ma’naviy qiyofasi, qonunchilikda ko’zda tutilgan talablarga rioya qilish, ro’y berishi mumkin bo’lgan favqulodda holatlar, noxush hodisalarning oldini olish kiritildi.