Мавзу: Физик кимёвий анализ методлари

ЭЛЕКТР КИМЁВИЙ АНАЛИЗ УСУЛЛАРИ


Мавзуга оид таянч тушунча ва иборалар: Электрокимёвий анализ, потенциометрик анализ, электрокимёвий занжир, усулнинг сезгирлиги.


РЕЖА
1. Электрокимёвий анализ усуллари тушунади ва асослаб беради.
2. Потенциометрик анализ усули, турларини изоҳлай олади.
3. Электрокимёвий занжирнинг тузилиши ва ундаги ҳодисаларини
ўрганади.
Дарснинг мақсади: Талабаларга Электрокимёвий анализ усуллари ҳақида тушунчалар , уларнинг турлари, потенциометрик анализ усули, усулнинг моҳияти, сезгирлиги, электрокимёвий занжирнинг тузилиши ва ундаги ҳодисаларини ўргатишдан иборат.


Индентив ўқув мақсадлари:
1. Электрокимёвий анализ усуллари ўрганади
2. Электрокимёвий занжир ҳодисаларини тушунади.
3. Потенциометрик анализ усулини изоҳлайди.
4.Кулонометрик анализ усулини асослаб бера олишни ўрганади.
5. Электрод жараёнларининг механизмини изоҳлашни ўрганади.
Электр кимёвий анализ усуллари электродлар устида ёки электродлар оралиғида содир бўлаётган жараёнларга асосланган. Бунда системанинг қатор катталиклари (потенциал, ток кучи, электр миқдори, қаршилик, сиғим, электр ўтказувчанлик ёки диэлектрик хоссалари) ўзгаради. Бу катталиклар аниқланадиган моддаларнинг эритмадаги концентрацияларига мутаносиб бўлганлиги ёки уларнинг ўзига
хос хусусиятлари билан белгиланганлиги учун улар ёрдамида ўша моддаларнинг табиати ва миқдорини аниқлаш мумкин. Ўлчанадиган мазкур қийматларнинг кўп сонли умумлашмалари мавжуд, бироқ улар анализ усулларини тўлиқ ифодалаб беролмайди ва шунинг учун ҳам усулларни синфлашда қатор чигалликлар учрайди. Бизнингча, барча электр кимёвий анализ усулларида электр занжири асосий ўринда турганлигини ҳисобга олиб, усуллар синфланишининг асосига электродларда бўладиган жараёнларни қўйиш мақсадга мувофиқдир. Шу асосда барча электр кимёвий усулларни уч гуруҳга бўлиш мумкин: 1) электрод реакцияларига асосланган электр кимёвий усуллар (потенциометрия, вольтамперометрия: полярография, амперометрия, инверсион вольтамперометрия, хроноамперометрия, хронопотенциометрия ва бошқа вольтамперометрик усуллар, кулонометрия, электр гравиметрия); 2) электрод реакциялари билан алоқадор бўлмаган электркимёвий усуллар (паст ва юқори частотали кондуктометрия, диэлкометрия); 3) қўш электр қаватнинг ўзгариши билан боғлиқ бўлган усуллар (тензамметрия, электр сорбцион анализ). Электр кимёвий анализ усулларининг ўлчанадиган қийматларига асосланган бир қатор бошқа синфлари ҳам мавжуд, бироқ улар, фикримизча, илмий негизга эга эмас.