Маърузалар матни 1-мавзу. Билимлар иқтисодиёти фанининг мақсад ва вазифалари

1.4. Халқаро иқтисодий муносабатларда инновацион ривожланишдаги ўзгаришлар

Олиб борилган тизимли ўрганишлар, таҳлиллар шундан далолат берадики, мамлакатимизда мустақиллик йилларида илм-фан ва инновацион фаолиятни давлат томонидан қўллаб-қувватлаш, соҳанинг жадал ривожланишини таъминлаш, жамиятимиз ва давлатимиз ҳаётига, хусусан, иқтисодиётимизнинг барча жабҳаларига замонавий иннновацион ва юқори технологияларни жорий этиш, мутаҳассисларга шароитлар яратиш, уларнинг меҳнатини моддий ва маънавий рағбатлантиришга қаратилган кенг кўламли ишлар амалга оширилиб келинмоқда.
Кейинчалик соҳани жадал ривожлантириш, инновацион лойиҳаларни ишлаб чиқаришга татбиқ этишга йўналтирилган 50 дан ортиқ қонун ва бошқа қонун хужжатлари қабул қилиниб, ҳаётга босқичма-босқич татбиқ этиб келинмоқда. Хусусан, бугунги кунда ушбу қонун ҳужжатларда белгиланган устувор йўналишлар (инновацион иқтисодиётни шакллантириш; қайта тикланувчи энергия манбаларидан фойдаланишни ривожлантириш; ахборотлаштириш ва ахборот-коммуникация технологияларини ривожлантириш; тиббиёт ва фармакология в.б.) доирасида Давлат инновация илмий-техника дастурига асосан 360 га яқин инновацион лойиҳалар бажарилмоқда. Бу 2014 йилда бажарилган лойиҳалар сонидан 2,8 мартага юқоридир. Охирги 3 йил мабойнида лойиҳалар доирасида 278 та патент, 195 та дастурий маҳсулотларга гувоҳномалар олинди, 95 та илмий тадқиқотлар натижалари амалиётга жорий этилди.
2010-2017 йиллар давомида давлат илмий-техника дарстурларини молиялаштириш ҳажми 568,1 млрд. сўмни ташкил этган. Хусусан, биргина 2017 йилда Давлат бюджети ва давлат мақсадли жамғармалари ҳисобидан илм-фанни ривожлантиришга 187,0 млрд. сўм ёки 2013 йилга нисбатан 13,6% кўп маблағ сарфланди. Ушбу маблағлар илмий-техника, инновацион лойиҳаларни молиялаштириш, илм-фанни ривожлантириш билан боғлиқ бошқа харажатларга йўналтирилди.
Амалий тадқиқотлар ва инновация ишлари лойиҳалари доирасида бажарилган фақатгина айрим юқори самарали ишланмаларни ишлаб чиқариш тизимига жорий этиш натижасида 1 трлн. 96 млрд. 800 млн. сўм ҳажмдаги янги маҳсулот ишлаб чиқарилган, 17,5 млн. АҚШ доллари ва 7,0 млрд сўм миқдорида иқтисодий самарадорликка эришилган ҳамда 25,6 млн. АҚШ доллари миқдоридаги маҳсулот экспорт қилинган.