Maktabgacha ta’limga qo‘yiladigan davlat talablari

3-§. Sensomotorikani rivojlantirish 

128. 12 — 24 oylik bolalarning sezgi organlari yordamida o‘z harakatlarini tartibga solish qobiliyatiga 

egaligi ularda sensomotorika rivojlanishining talabi hisoblanadi. 

129. Quyidagilar 12 — 24 oylik bolalarda sensomotorika rivojlanishining indikatorlari hisoblanadi: 

suvni kichik idishdan katta idishga quyish; 

quloq, burun, ko‘z kabi tana a’zolarini ko‘rsata olish; 

buyumlarni qo‘llarida ushlab turish va bir-biriga urish. 

130. 12 — 24 oylik bolalar bilan quyidagi mashqlarni o‘tkazish lozim: 

bolaga turli o‘lchamdagi ikkita idish berib, bir idishdagi suvni ikkinchi idishga quyishni so‘rash; 

ushbu jarayonda ko‘rgazmali va kutilmagan hodisalar ro‘y beradigan qiziqarli uslublardan foydalanish; 

bolaga u ko‘rayotgan narsa va harakat o‘rtasidagi bog‘liqlikni tushunishga yordam berish; 

bolaga issiq suvning haroratini his etish va undan qochish imkoniyatini yaratish; 

bolaning har bir yutug‘ini rag‘batlantirish. 

131. 12 — 24 oylik bolalarning xavfsiz yashashi va harakatlanishini ta’minlash maqsadida: 

bolani jarohatlanishdan saqlash; 

bolaning ko‘chada yiqilib ketishining oldini olish; 

bolaning o‘z gavdasini qanday tutishini kuzatib turish lozim.