М а р к е т и н г асосий маркетинг тушунчалари ва замонавий сўзларининг қисқача изоҳли луғати

Нейминг (naming) – бу келгусидаги бренд номини ишлаб чиқиш билан боғлиқ бўлган маркетинг фаолиятининг туридир. Нейминг фаолияти асосида келгусидаги брендни шакллантириш жараёни бошланади.
Ноу-хау (know how) - бу (инлизча “know how” иборасидан олинган бўлиб, ўзбек тилига таржима қилинганда «қандайлигини биламан», деган маънони англатади) ишлаб чиқариш жараёнининг (маҳсулот ишлаб чиқариш сирлари, янги услуб ва ғоялар, кашфиётлар ва ҳоказолар) фаолият кўрсатиши учун зарур бўлган технологик, илмий-техник, тижорат ва ташкилий билимлар йиғиндисидир. У тижорат амалиётида кашфиёт патентлари, товар белгилари, авторлик ҳуқуқлари билан биргаликда корхонанинг мулки ҳисобланиб, улардан фойдаланиш ҳуқуқи эса олди-сотди предметидир.
О
Оферта (offer) – бу алоҳида ассортиментдаги товарлар, хизматлар, фаолият турларининг таклифидир. Унинг қуйидаги икки тури мавжуддир, яъни қаттиқ оферта–унда товар партиясининг аниқ номлари, размерлари, нархлари, тўлов ва етказиб бериш шартлари қатъий белгиланади, шунингдек, конкрет вақт ичида истеъмолчи ушбу шартларни қабул қилганлиги ҳақида хабар бериши шарт. Юмшоқ офертанинг қаттиқ офертадан фарқи, шартномани тузишга қадар унинг конкрет шартлари бўйича қўшимча келишув имконияти берилади ёки таклифга кўрсатилмаган (ноаниқ) вақт давомида ўз розилигини билдириши мумкин.
П
Паблисити (publicity) – бу корхона ва унинг маҳсулотлари ҳақида тарқатиладиган ахборотларни корхона томонидан тўланмаган ёки ҳомий (спонсор) орқали оммавий коммуникация воситаларида силжитиш фаолиятидир. Паблисити жамоатчилик билан алоқанинг таркибий бир бўлагидир.
Панель (Panel) – бу тадқиқотчилар томонидан маълум бир вақт оралиғида, улар хақида ахборот йиғиладиган, тўпланадиган респондентлар (сўров ўтказишда иштирок этувчи шахслар)нинг мақсадли гуруҳидир. Панель билан ишлаш кўп ташкилий ва молиявий харажатларни талаб этади, шу сабабли бу иш билан асосан профессионал тадқиқот (шу жумладан, маркетинг) агентликлари шуғулланадилар.