М а р к е т и н г асосий маркетинг тушунчалари ва замонавий сўзларининг қисқача изоҳли луғати

Мақсадли аудитория (target audience) - бу маркетинг коммуникацияларини кучи йўналтирилган (харидорлар ва истеъмолчилар гуруҳи, потенциал ва реал ташкилотлар ёки айрим шахслар) аудиториясидир.
Мақсадлар дарахти (goals tree) – бу бир қанча поғоналар тизими шаклидаги ҳамда бир-бири билан ўзаро узвий алоқада бўлган мақсадлар, вазифалар ва чора-тадбирлар юзасидан қарорлар қабул қилиш бўйича график кўринишидаги моделдир.
Амалиётда кўпинча белгиланган барча мақсадларни ҳаётга татбиқ этиш учун мавжуд ресурслар етишмайди, шу сабабли, аввал аҳамияти бўйича энг керакли бўлган мақсадлар ажратиб олиниб, амалга оширилади.
Маҳсулот дифференциацияси (product differentiation) – бу корхонани рақобатчиларига нисбатан, яхши тавсифномага ёки дизайнга эга бўлган маҳсулотларини таклиф этишдир. Масалан, корхона ўзининг асосий кучини, фан ва техниканинг сўнгги ютуқларига жавоб берадиган маҳсулотга йўналтириши ёки тармоқда маҳсулот сифати бўйича етакчилик қилишдир.
Мерчандайзинг (merchandising) – бу чакана савдо шохобчалари (магазинлари) даги маркетинг фаолиятининг туридир.
У ўз ичига қуйидагиларни олади: дўконлар пештахталарини, кўргазмаларини (витриналарини) безаш, савдо залида товарларни жойлаштириш, товарлар ҳақида маълумотларни келтириш.
Мақсад – маълум бир товарлар сотувини яхши ташкил этишдир. Маркетингнинг бу туридан дўконларга (магазинларга) харидорларни жалб қилиш, савдо айланмасини ошириш ҳамда товарларни фаол силжитиш учун фойдаланилади.
Мижоз (client) – бу товарлар ва хизматларни олувчи (сотиб олувчи) алоҳида шахс, корхона, компания ёки ташкилот бўлиб, у бошқа алоҳида шахс, корхона, компания ёки ташкилотдан уларни сотиб олади.
Мотивация (motivation) - бу индивиднинг маълум бир мақсадларга эришишига йўналтирилган, масалан, товарлар(хизматлар)ни танлаш ва сотиб олиши бўйича феъл-атворини фаоллаштирувчи модели, яъни унинг ички ҳолатидир.
Мобиль маркетинг (mobile marketing) – бу мобиль телефон ёки чўнтак компьютери орқали товар(хизмат) ҳақида мақсадли аудиторияга ахборот етказиш жараёнидир (маркетинг коммуникациялари комплекси орқали ахборот етказиш жараёни). Маркетологлар фикрича, мобиль телефон коммуникация каналлари сифатида фойдаланилади, яъни харидни олинганлигини тасдиқлаш, сўровлар ўтказиш, талабни ўрганиш воситаси, реклама ва сотувни рағбатлантириш.