М а р к е т и н г асосий маркетинг тушунчалари ва замонавий сўзларининг қисқача изоҳли луғати

Бозор сегментацияси (market segmentation) – деганда бозорни аниқ харидорлар гуруҳига бўлиш тушунилади.
Бозорлар харидорлар йиғиндисидан ташкил топади, харидорлар эса бир-биридан турли хил параметрлари билан фарқ қилади. Уларнинг эҳтиёжлари, даромадлари, географик ҳолатлари, хулқ-атворлари, демографик ҳолатлари ва психографик принциплари ҳар хил бўлади.
Бу келтирилган кўрсаткичларнинг ҳар бири бозорни сегментлаш асоси сифатида ишлатилади.
Бозор нархи (market price) – бу аниқ бозорда, маълум бир вақт оралиғида бирор товарни сотишни амалга оширишнинг ўртача нархидир.
Бозор ҳиссаси (market share) – корхона маҳсулотининг умумий сотув ҳажмининг айнан шу бозорда ҳаракат қилаётган бошқа барча корхоналарнинг худди шундай (айнан бир хил) маҳсулотлари умумий сотув ҳажми йиғиндисига нисбати билан ўлчанади. Бозор ҳиссаси корхонани бозорда олиб бораётган рақобат курашига баҳо беришда асосий кўрсаткич ҳисобланади. Корхонанинг бозордаги ҳиссаси ўсиб боргани сари, унинг рақобат курашидаги мавқеи ҳам ортиб боради.
Бозор сиғими (market capacity) - бу маълум бир вақт давомида товар таклифининг, шу пайтдаги ҳажми ва таркиби, шунингдек, нархлар даражасига боғлиқ бўлган талабнинг миқдоридир. У натурал ва киймат кўринишида ифода этилади.
Бозор инфраструктураси (market infrastructure) - бу бозор жараёнларини таъминловчи ва кузатувчилари бўлган улгуржи ҳамда чакана савдо корхоналарининг барча таъминотчилари, биржалар, брокерлик компаниялари, молиявий ва назорат институтлари, тадқиқот ва бошқа ташкилотлардир.
Бозор бўшлиғи (market niche) – бу бозорнинг кичик сегментлари бўлиб, уларда айрим корхоналар фаолият юритмоқдалар ёки бошқа рақобатчи корхоналар у жойни пайқамайдилар ёки у жойни ўзлари учун фойдали деб ҳисобламайдилар. Бу жой моҳиятан сегмент ичидаги сегментдир. Бозор бўшлиғи кам доирадаги мижозларни ўзига хос эҳтиёжларини самарали қондириш ҳисобига фойдали бўлиши мумкин. Битта бўшлиғдаги хавф-хатарни камайтириш мақсадида, корхоналар кучли рақобатчиларга қизиқарли бўлмаган, ўсиш потенциалига эга бўлган бир қанча бўшлиқларни топишга харакат қиладилар.