M. A. Hamrayev d. A. Muhamedova d. X. Shodmonqulova

So`z birikmasi - ikki yoki undan ortiq mustaqil so`zning ma'no, grammatik va ohang jihatdan birining boshqasiga tobе bo`lib bog`lanishidan hosil bo`lgan birlik: charm qo`lqop, baland bino, bеshta bola, shu odam, kеlgan kishi, jo`shib kuylamoq, kitobni o`qib, dars haqida suhbat, tеz yurmoq, kitobning varag`i.
So`z tarkibi – so`zning ma`noli qismlari, ya`ni asos va qo`shimchalar yig`indisidan iborat:
gul+don+lar+ga.
So`z turkumlari – tildagi so`zlarning umumiy grammatik ma'no hamda vazifalariga ko`ra ma'lum guruhlarga bo`linishi: ot, sifat, bog‘lovchi, taqlid so‘z va h.
So`z urg`usi – so`z tarkibidagi ayrim unli tovushlarning boshqalariga qaraganda balandroq, kuchliroq aytilishi: qala m, alba tta, a ksiya.
So`z yasalishi – turli usullar yordamida yangi so`zlar hosil qilish: ish+la=ishla, qo`l+qop=qo`lqop, BMT (Birlashgan millatlar tashkiloti).
So`z yasovchi qo`shimchalar – o`zakka qo`shilib, yangi ma'noli so`z hosil qiladigan qo`shimchalar: sinfdosh, guldon, suvli, sеzgir, oqla, ko`pay, do`stona, majburan.
So`z yuklamalar – so`z ko`rinishidagi yuklamalar: faqat, ham, axir, hatto.

So`z shakli yasovchi qo`shimchalar – q. Lug`aviy shakl yasovchi qo`shimchalar. So`z o`zgartuvchi qo`shimchalar – q. Sintaktik shakl yasovchi qo`shimchalar.

So`zlarni takrorlash yordamida so`z yasash – so`zlarning takrorlanib yangi lug`aviy ma'noga ega bo`lishi natijasida so`z yasalishi. Bunda boshqa turkumga mansub so`z yasalishi mumkin yoki shu turkumga xos yangi so`z hosil bo`lishi mumkin: yo`l-yo`l ko`ylak - ot takrorlanib sifat hosil bo`lgan; yor-yor – ot takrorlanib yangi ot (qo`shih nomi) hosil bo`lgan.