Личинка хордалилар (Urochordata) ¸ки šобиšлилар (Tunicata) кенжа типи

Skatlar (Batoidei) turkumi vakillarining tanasi yelka-qorin tomoniga qarab yassilashgan, keng disksimon yoki rombsimon shaklda bo`ladi. Uzunligi bir necha sm dan 6-7 m gacha, og’irligi 2,5 t gacha keladi. Terisi yalang’och, jabra teshiklari 5 juft bo`lib, qorin tomonida joylashgan. Ko`krak suzgichlari kuchli rivojlangan, kengaygan. Ko`krak va qorin suzgichlarining cheti boshi va tanasining yon tomoni bilan tutashib ketgan. Orqa suzgichlari dum tomonida bo`ladi yoki bo`lmaydi. Gavdasi yapaloq bo`lganligidan jabra yoriqlari, og’iz teshigi va burun teshiklari boshining ostida joylashgan. Ko`zlari va sachratqichlari esa boshining ustida joylashgan. Skatlarning anal, aksariyat hollarda dum suzgichlari bo`lmaydi. Yassi to`mtoq tishlari kuchli qirg’ichni hosil qiladi.
Aksariyat turlari dengiz va okean tubida kam harakat qilib yashaydi, ayrim turlari (mantasimonlar, tikandumlilar) suv qa`rida hayot kechiradi. Asosan dengizlarda, deyarli barcha mintaqalarda birmuncha sayozlikda 2700 m chuqurlikkacha hayot kechiradi. Ayrim turlari tropik daryolarda (Amazonka va boshqa daryolarda) uchraydi. Bentos organizmlar bilan, asosan mollyuskalar bilan oziqlanadi yoki yirtqich hayot kechiradi. Mollyuskalarning chig’anoqlarini to`mtoqlashgan tishlari bilan maydalaydi. Tirik tug’adi yoki tuxumdan tirik tug’ib ko`payadi. Faqat rombsimon skatlargina suv tubiga yirik tuxum qo`yadi. Skatlarning 350 ga yaqin turlari va 10 dan ortiq oilalari bor (48-rasm). MDHning shimoliy dengizlarida skatlarning 7 ta turi uchraydi.
Arrabaliqlar (Pristidae) oilasi vakillari tanasining shakli arraburun akulalarga o`xshash, cho`ziq uzun tumshug’ining ikki yonida yirik tishsimon o`simtalari bo`ladi. Tanasining yassiligi, jabra teshiklar boshining ostki tomonida joylashganligi, ko`krak suzgichlarini og’iz yaqinida boshi bilan tutashib ketganligi, tumshug’ida mo`ylovlarining bo`lmasligi bilan arraburun akulalardan farq qiladi.
Arrabaliqlar oilasiga 7 ta tur kiradi. Oddiy arra baliq (Pristis pectinatus) Atlantika, Tinch va Hind okeanlarining sohilga yaqin joylarida va O`rta yer dengizida uchraydi. Uzunligi 4-5 m, ba`zan 6 m gacha yetadi. Tuxumdan tirik tug’ib ko`payadi. Dengiz tubidagi loyqadan arra tumshug’i yordamida organizmlarni kavlab olib yeydi. Ular baliqlarni ovlaganda arrasimon tumshug’i bilan baliqlarni urib jonsarak qiladi va keyin yeydi.