Laboratoriya jumıs №1

Sıvorotka menen emlew ha`m keselliktin` aldın aldın alıw.
Normal ha`m immun zardaplarg`a bo`linedi. Normal zardaplar donor qanınan ajıratıp alınadı, ju`da` awır keshetug`ın juqpalı keselliklerdi emlew ha`m aldın alıwda isletiledi. Quramında, tiykarınan belgili bir patogen mikroorganizmge qarsı antitelolar tutıwshı zardaplar immun zardaplar dep ataladı. İmmun zardaplar juqpalı kesellikten du`zelgen adamlar qanı yaki sol kesellik qozg`atıwshısının` o`zi yaki antigenleri menen bir neshe ma`rte immunizatsiya (giperimmunizatsiya) qılıng`an haywanlar (ko`binshe atlar) qanınan alınadı. Bunday zardap beloktın` quramında adam zardabındag`ı beloklarg`a jaqın, sol sebebli adamlarg`a jiberilgende allergiyalıq reaktsiyalar kem gu`zetiledi. Bunnan tısqarı, atdan ko`bi menen 10 litrgeshe qan alıwı mu`mkin. Antigendi qansha mug`darda da neshe ma`rtebe jiberiw onın` toksigenligine ha`m immunegenligine baylanıslı. Da`slep haywanlarg`a antigennin` kishi mug`darı teri astına jiberiledi, son` a`ste-aqırın mug`darı asırılıp barıladı.
Haywanlardı immunizatsiya qılıw tamam bolg`annan keyin, aradan 3-4 ku`n o`tken son` sınaw ushın az mug`darda qan alınıp, onda immunoglobulinler mug`darı, yag`ni antitelonın` titri anıqlanadı. Eger titr jeterli mug`darda bolsa, onda haywannan kerekli ko`lemdegi qan alınadı, eger antitelonın` titri az mug`darda bolsa, onda haywang`a ja`ne 1-2 ma`rte antigen jiberip, son` kerekli mwg`dardag`ı qan alınadı, Onın` sterilligi, ha`wipsizligi, belok mug`darı, ren`i, titri tekseriledi ha`m keyingi basqıshta artıqsha beloklardan tazalanadı.
Dawalaw ha`m profilaktika ushın isletiletug`ın immun zardaplar tazalang`an, kontsentratsiyalang`an tu`rinde shıg`arıladı. Olardı ammoniy sul`fat, ul`tratsentrifuga, elektrofarez, gidrolitik fermentler ja`rdeminde ajıratıp alınıp, kereksiz beloklardan tazalanadı.
İmmun zardaplar eki toparg`a bo`linedi: toksinge qarsı- antitoksik ha`m bakteriyalarg`a qarsı- antibakterial. Buwma, botulizm, stolbnyak, anaerob infektsiya, shayan ha`m jılan za`ha`rlerine qarsı antitoksik zardaplar tayarlanadı. Stafilokokk, streptokokk ha`m ko`k iyrin` tayaqshasına qarsı antibakterial zardaplar qazirgi waqıtta ken` qollanılmaqta.
İmmun zardaplar arnawlı qollanbag`a qatan` a`mel qılınıp isletiledi. İmmun zardap mug`darı xalıqaralıq birlikte (XB) o`lshenedi.
Normal immunoglobulinlnrdi zardaptan etil spirti ja`rdeminde to`men temperaturada fraktsiyalarg`a ajıratıp alınadı. Globulinlerdi fraktsiyalarg`a ajıratıw etil spirti kontsentratsiyasının` o`zgeriwine,rN ha`m quramındag`ı elektrolitler mug`darına baylanıslı.
Adam qanınan tayarlang`an immunoglobulinler qızamıq, poliomielit, ko`kjo`tel, gepatit A, epidemik parotit, suwsheshek, skarlatina, shınsheshek, stolbnyakqa qarsı, joqarı dem alıw jolı ha`m murtak bezleri te-tez isinetug`ın balalarg`a profilaktika maqsetinde qollanıladı. Zardaplardı kereginen artıqsha qollanıw mu`mkin emes, sebebi adamlarda allergik zardap keselligi rawajlanıwı mu`mkin.
Qazirgi waqıtta alımlar aldında juqpalı keselliklerdin` arnawlı profilaktiasın ja`nede rawajlandırıw, qollanılıp atırg`an vaktsinalardın` sıpatın ja`nede jaqsılaw, basqada tu`rlerin tabıw wazıypası turıptı.