Kostum va moda tarixi

6.2. UYG‘ONISH DAVRI ISPANIYA VA G‘ARBIY 
YEVROPANING BOSHQA DAVLATLARI  
KOSTUMI TARIXI
Italiyada boshlangan Uyg‘onish harakati XV asrdan boshlab 
Yevropaning bir qancha yerlarida ham tarqaldi. Yevropa 
mamlakatlaridagi Uyg‘onish davri madaniyati va san’atining 
boshlanishi hamma yerda bir xil va bir vaqtda rivojlandi, deb 
bo‘lmaydi. Bundan tashqari, bu vaqt ba’zi mamlakatlar san’ati 
va adabiyotida yutuqlar sezilarli bo‘lsa (masalan, Angliya, 
Ispaniya), boshqa bir qator mamlakatlarda esa, tasviriy san’at 
va me’morchilikda insonparvarlik tamoyillari o‘zini to‘liq ifoda 
etdi. Ayrim mamlakatlarda feodal munosabatlarning sekinlik 
bilan chekinishi ham bu yerlarda Uyg‘onish san’atining gurkirab 
o‘sishiga to‘sqinlik qildi. Jumladan, Fransiyada Uyg‘onish 
harakati XV asr o‘rtalaridan boshlanib, uning rivoji bevosita, 
gotika merosining realistik tomonlarini rivojlantirish bilan 
birga, asta-sekin Italiya renessansini o‘zlashtirish va tatbiq etish 
bilan birga namoyon bo‘ldi. Fransiyada Uyg‘onish harakatining 
kuchayishi bu yerga ko‘plab italiyalik san’atkorlarning kirib 
kelishi bilan bog‘liqdir.