Күкирт кислотасы өндириси

Жыллылық алмастырыўшы үскенелер ҳәм олардың ислеў принципи

• Жыллылық алмастырыў үскенелери – көбирек қыздырылған жыллылық тасыўшыдан, екинши бир аз муғдарда қыздырылған жыллылық тасыўшыға жыллылықты жеткерип бериў ушын қолланылады. Химиялық заводларда жыллылық алмастырғышлар өз-алдына агрегатлар сыпатында ямаса басқа үскенелер ҳәм қурылмалардың айрым бир бөлеги сыпатында да кеңнен қолланылады. Жыллылық алмастырыў процесси қыздырыў ямаса суўытыў ушын қолланылады. Ол жыллылық тасыўшының агрегатлық жағдайының өзгериўи ямаса сақланыўы менен әмелге асады.
• Ҳәрекет етиў принципи бойынша жыллылық алмастырғышлар рекуператив, регенератив ҳәм араластырғыш түрлерге бөлинеди.
• Рекуператив жыллылық алмастырғышларда жыллылық жеткерип бериў, еки жыллылық тасыўшыны бөлип туратуғын дийўал арқалы әмелге асырылады.
• Регенератив жыллылық алмастырғышларда жыллылық қатты материал – насадкаға бериледи, бул жыллылық кейин ала насадканы жуўыўшы, азлап қыздырылған жыллылық тасыўшыға бериледи.
• Араластырғыш жыллылық алмастырғышларда жыллылық алмасыўы, жыллылық тасыўшылардың тиккелей тийисиўи нәтийжесинде әмелге асады.

Жыллылық алмастырғыш

Жыллылық алмастырғыш вертикаль цилиндр көринисинде болып, диаметрлери онша үлкен болмаған, еки тәрепи ашық, полат трубалар тутастырылған решеткаларға 1 ийе. Жыллылық алмастырғыштың ишинде горизонталь решеткалар 2 жайласқан, олардың мақсети трубалар аралық кеңисликте газдиң бөлистирилиўин жақсылаў ҳәм жыллылық жеткерип бериўди күшейтиў болып есапланады. Жыллылық алмастырғыш компенсатор 3 ҳәм лазға 4 ийе. Контактлестириў бөлиминен шыққан ыссы газ (SO3) жыллылық алмастырғыштың трубалары бойлап жоқарыдан төменге қарай, трубалар аралық кеңисликке төменги тәрепинен келип түсетуғын күкирт ангидридине (SO2) қарама – қарсы бағытта ҳәрекетленеди. Күкирт кислоталы конденсат ўақты – ўақты менен жыллылық алмастырғыштың ултанындағы саңлақ 5 арқалы шығарып тасланады. Егер қурғатыў бөлиминиң жумысы нормаль тәризде өтсе, онда контактлестириўге жибериўден алдыңғы газдиң қурамындағы ығаллықтың муғдары 0,2 г/м3 тен аспайды, усының ақыбетинде жыллылық алмастырғышта күкирт кислотасының шөгиўи жүз бермейди.