Кичик гуруҳ (3-4 ёш)

Атроф олам тўғрисидаги билимга эга бўлиш ва уни англаш 
Она Ватан ва атроф-олам. Болаларга инсонлар маълум вақтда овқатланиши, суюқлик 
ичиши, ухлаши ва бунинг учун уларга нималар кераклиги, кун давомида болаларга катталар 
ишлашлари, болалар эса мактабгача таълим муассасаларига, ўқувчилар эса мактабларга 
боришлари тўғрисида тушунча бериш. 
Болаларни ўз исми, ёши, бошқа болалар исмини айтишга ўргатиш, ундаш. 
Оила аъзолари (ота-она, ака-ука, опа-сингил)га муҳаббат, ҳурмат ҳиссини тарбиялаш. 
Болаларнинг қариндош-уруғ (буви, хола, амма, тоға, амаки, опоқи ва ҳ.к.)ҳақидаги 
тушунчаларини кенгайтириш.
Болаларда инсонлар уйда яшашлари, овқат тайёрлашлари (шўрва пиширишлари, 
сабзавотларни кесишлари, сутни қайнатиш); кийим-кечаклар (об-ҳавога қараб кийиниш, 
кийим-кечакларни тикиш, тўқиш); нарса ва жиҳозларни дўконлардан сотиб олиш 
мумкинлиги ҳақида тасаввурларини шакллантириш.
Теварак-атрофдаги предметлар ва одатий ҳаракатлар (столда овқатланадилар, стулда 
ўтирилади, курсига ўтириш мумкин) ҳақидаги тасаввурларини кенгайтириш. 
Болаларга атроф-оламдаги воқеа-ҳодисаларнинг бир-бирига боғлиқлигини исботлаш. 
Масалан: Ҳаво совуқ. иссиқроқ кийиниш керак, қоронғу бўлса-чироқ ёқиш керак, қаттиқ 
шамол бўлса, деразаларни ёпиш керак. 
Буюк сиймолар ва байрамлар. Болаларга Алишер Навоий ҳақида илк маълумотлар 
бериш. Навоий расми билан таништириш. Тарбиячи Алишер Навоийнинг расмда акс этган 
сиймоси ҳақида тушунарли, содда жумлаларда айни пайтда меҳр ва ифтихор билан 
болаларга тасвирий ҳикоя (нуронийлиги, кўзларининг меҳр билан боқиши, кийимлари) айтиб 
бериш орқали унга нисбатан муҳаббат, ҳурмат ҳиссини уйғотиш. Китоб бурчагига Алишер 
Навоийнинг расми акс этган китоблар қўйиш мумкин. 
Болаларда “Мустақиллик”, “Меҳржон”, “Наврўз” байрами ҳақида тасаввур ҳосил 
қилиш. 
Кичиклар катталар (ота-оналари, буви, боболари)ни ҳурмат қилиб, байрамларда уларни 
бориб кўришлари, ҳар хил совғалар олиб боришлари, катталар уларни дуо қилишлари ҳақида 
тушунча бериш. Болаларда катталардан дуо олишга, “баракалла”, “рахмат” сўзларини
эшитишга нисбатан қизиқиш уйғотиш.