Кичик гуруҳ (3-4 ёш)

Эмаклаш ва тирмашиш машқлари. Камида 10 м масофагача ҳамда 
турли баландликдаги буюмлар остидан эмаклаб ўтиш. Гимнастика 
ўриндиғида қўлларга таянган ҳолда, қорин билан судралиш. Тўрт оёқлаб 
эмаклаш, гимнастика деворига ўнгдан чапга ўтиб тирмашиб чиқиш; 20-30 
см баландликда тортилган арқон тагидан, халқа орасидан эмаклаб ўтиш. 
Юмалатиш, ирғитиш ва илиб олиш машқлари. Тўпни бир-бирига 
ирғитиб, деворга, ерга уриб илиб олишга, навбатма-навбат ўнг ва чап қўл 
билан тўпни уришга, оғирлиги 0,5 кг бўлган тўпларни ерда юмалатиш, 
улоқтиришга ўргатиш.
Спорт машқлари. Велосипед ҳайдаш. Уч ғилдиракли велосипедда 
ўнгга ва чапга бурилиб, доира бўйлаб, тўсиқларни четлаб ўтиб ҳайдаш ва 
буйруқ бўйича тўхташга ўргатиш. 
 Сузиш. Сувда қўл ва оёқларини ҳаракатлантиришни, нафас олиб, 
нафас чиқариб сузишни ўргатиш.
Умумривожлантирувчи машқлар. 
Қўл ва елка учун машқлар. Дастлабки ҳолат: гавда тик тутилган, 
оёқлар елка кенглигида очилган, қўлларни олдинга, ён томонга, юқорига 
кўтариш ва тушириш. Қўлларни ёнга, олдинга узатган ҳолда кафтларни 
очиб ёпиш ва айлантириш. Қўлларни бирин-кетин навбат билан олдинга ва 
юқорига кўтариш, тушириш, орқага ва олдинга айлантириш. Қўлларни 
тирсакдан букиб сўнг ёзиш.
Оёқ учун машқлар. Навбати билан аввал товонда сўнг оёқ учида 
туриш; кетма-кет бир неча марта ярим ўтириб туриш, оёқ кафтларини 
букиш ва ёзиш; оёқ панжалари билан арқонни йиғиш, товон билан 
буюмларни бир жойдан иккинчи жойга силжитиш; бир оёқни букиб, 
иккинчисида туриш. 
Гавдани ривожлантирувчи машқлар. Қўллар белда, уларни ён 
томонга узатиб гоҳ чап, гоҳ ўнг томонга буриш; оёқларни жуфтлаб 
олдинга эгилиш; қўл бармоқларини оёқ учига тегизиш: бирон нарсани ерга 
қўйиш ва олиш; бир оёқни кўтариб унинг остидан бирор буюмни ўнг 
қўлдан чап қўлга ўтказиш. Тиззаларга таяниб, белни букиш ва тўғрилаш; 
қўлларни навбат билан кўтариш; чалқанча ётган ҳолда қўллар билан турли 
ҳаракатларни бажариш; айланиб қоринда ётиш, қўлни узатиб бирор 
буюмни ушлаб туриш; қорин билан ётган ҳолда олдинга узатилган қўлни, 
елка ва бошни кўтариш кабиларни ўргатиш.