Kasb hunar kollej

3 Standartning maqsad va vazifalari
3.1. Standartlashtirishning maqsadi:
- “Maktabgacha ta’lim muassasalari tarbiyachisi” kasbi bo‘yicha sifatli kasbga o‘rgatishning davlat tomonidan kafolatlanishini va uning ekvivalentligini mehnat bozori talablariga mos holda davlat va nodavlat muassasalari darajasida ta’lim xizmati mazmuni va yakuniy maqsadi talablari reglamentiga to‘g‘ri kelishini ta’minlash;
- O‘MKHT tizimi, mehnat bozori va jamiyat o‘rtasidagi o‘zaro hamda qayta munosabatlarni qonuniy ravishda o‘rnatishdan iborat.
3.2. Standartlashtirishning asosiy vazifalari quyidagilardir:
- kichik mutaxassislar tayyorlash sifatiga qo‘yiladigan zaruriy talablarni belgilash;
- “Maktabgacha ta’lim muassasalari tarbiyachisi” kasbi bo‘yicha Davlat ta’lim standartlari talablarini rivojlangan mamlakatlarning shu yo‘nalishdagi standart talablari bilan muvofiqlashtirish;
- o‘quv reja va dasturlar, bitiruvchilarga beriladigan diplom va sertifikatlar hamda ularning egallagan bilim, ko‘nikma va malakalarini o‘zlashtirish darajalarini nazorat qilish usullari va baholash mezonlari to‘g‘risidagi me’yoriy hujjatlarni ishlab chiqish uchun zamin yaratish.
4 Ta’riflar
Ushbu standartda quyidagi atamalardan va ularga berilgan ta’riflardan foydalanilgan.
Kasbiy faoliyat sohasi (KFS) kasbiy bilim, malaka va amaliy ko‘nikmalarning qo‘llanish doirasidir, uning nomlanishi iqtisodiy sohalar nomlari bilan moslashtiriladi.
Tayyorlov yo‘nalishi – O‘rta maxsus, kasb-hunar ta’limi muassasasi bitiruvchisi tomonidan egallanadigan va beriladigan «kichik mutaxassis» malaka darajasi doirasida kasb faoliyatining muayyan turini bajarishni ta’minlovchi tayanch va fundamental bilimlar, malaka va ko‘nikmalar majmuasidir.
Kasb – maxsus tayyorgarlik va tajriba natijasida ma’lum bir sohada kasbiy faoliyatni amalga oshirish uchun zarur bo‘lgan nazariy bilimlar, amaliy ko‘nikmalar va malakalar majmuasini hamda ikki va undan ortiq ixtisosliklarni egallagan, jismoniy imkoniyat, aqliy qobiliyat va yuridik huquqlarni ta’minlovchi insoniy mehnat faoliyati (mashg‘uloti) ning turidir.
Ixtisoslik – birorta kasb doirasida ma’lim bir faoliyat turi uchun maxsus tayyorgarlik va ish tajribalari bilan erishilgan zaruriy bilimlar, ko‘nikma va malakalar majmuasi.