Касалликлари ва зараркунандаларига қарши

Манзарали экинлар ва гуллар

Астралар – ушбу гулларга зарар келтирувчи зараркунандаларга аввало шиллиқ қуртлар киради. Улар гулларнинг яшил қисмларини, бутонларини ва гулларни ейдилар. Бу эса гулларнинг ташқи кўринишига жуда ёмон таъсир қилади. Ўтлоқ қуртлари баргларни ва бошқа органларни тешиб, улардан гулнинг сокларини оладилар ва натижада гулнинг кўриниши хунук холга келади ва барглари ғижимланиб кетади. Хризантема нематодаси фаолияти гул баргларини оч яшил холга келтиради, кейинчалик бу барглар буралиб, қуриб қоладилар.
Гвоздикалар - уларнинг ҳам асосий душманларидан бири шиллиқ қурт, бошқаси эса гвоздика пашшаларидир. Уларнинг личинкалари барглар, тана ва шохларнинг ички органлари билан озиқланадилар ва натижада зарарланган қисмлар сўлиб, чирий бошлайдилар.
Георгиналар – унинг асосий душманлари нематодалар, ўргимчакканалар, симқуртлар, битлар ва қуртлардир. Уларнинг фаолияти натижасида георгиналарнинг ташқи ва ички органлари хамда илдизлари зарарланадилар.
Гладиолуслар – бу гулнинг зараркунандаларига пиёзнинг илдиз қурти, гладиолус трипси, нематодалар, шиллиқ қуртлар киради. Илдиз қурти гладиолус пиёзига кириб олиб, уни зарарлайди ва натижада гулнинг ўсиши секинлашади, барглари сарғаяди ва гул аста-секин сўлий бошлайди. Трипсдан зарарланган гладиолуснинг барглари доғли бўлиб қолади, гуллари эса сўлиб, рангсиз бўлиб қолади ва қурийди.
Жасмин – унинг учун энг хавфли зараркунанда жасмин бити бўлиб, у ўсимлик сокларини сўриб олиб, гулнинг ривожланишини секинлаштиради ва гул қуриб қолади.
Гулсафсар (ирис) – унинг душманларидан бири нарцисс пашшаси ёки пиёз пашшасидир. Ёрқин яшил рангли пашшалар гулнинг ёнидаги тупроққа тухум қўядилар ва улардан чиққан личинкалар гулсафсарнинг пиёзи билан
озиқланадилар. Зарарланган гулларнинг барглари сарғаяди ва улар аста- секин сўлиб қоладилар.
Лола, лилия ва нарцисслар – Уларнинг энг хавфли душманлари сирасига илдиз пиёзи қуртини киритиш мумкин. Кўпинча улар тўла етилмаган, кучсиз ва механик зарарланган гул пиёзларга зарар келтирадилар. Зарарланган пиёзлар қуриб қоладилар ёки чирийдилар. Гул баргини еювчи хашоротлар гул баргларини еб тирикчилик қиладилар ва уларда чуқур излар қолдирадилар. Нематода, трипслар, шиллиқ қуртлар ҳам анча зарар етказишлари мумкин.