Касалликлари ва зараркунандаларига қарши

Касаллик ва зараркунандаларга қарши курашнинг оддий, халқчил ва оммабоп усуллари

Ўсимликларни касаллик ва зараркунандалардан химоя қилишнинг асосий усулларига турли хил ўсимликлардан тайёрланадиган табиий (натурал) препаратлар (улар кимёвий заҳарли моддаларнинг ўрнига ишлатилиши мумкин), механик, агротехник, кимёвий, биологик усулларни киритиш мумкин. Уларнинг оддий ва халқчилларини қисқача ва хаммабоп равишда ёритиб ўтамиз:

Ўсимлик препаратлари

Зараркунандаларга қарши заҳарли химикатларсиз ҳам уй шароитида тайёрлана оладиган, арзон ва қулай, қўлбола дорилар орқали ҳам бемалол курашиш мумкин. Бунинг учун зараркунандалар учун заҳарли бўлган қуйидаги дамлама ва қайнатмалардан фойдаланиш мумкин:
Саримсоқпиёз: Кўпчилик севиб истеъмол қиладиган саримсоқпиёз бошқа турдаги ўсимликларни биологик химоя қилиш воситаси сифатида ҳам ишлатилиши мумкин. Масалан, агар картошкани қишки-баҳорги мавсумда касалликлардан сақлаш керак бўлса, уни сақлаш пайтида картошканинг устига майдаланган саримсоқ сепиб қўйилади. Бунда хар 100 кг картошкага 100 грамм майдаланган саримсоқ зарур бўлади.
Дон омборларида эса донларни зараркунандалардан химоя қилиш учун 1 тонна донга 200 грамм яхшилаб майдаланган саримсоқ кифоя қилади. Дон сақлаш омборининг девор ва полларига ишлов бериш учун керакли ўсимликларнинг қайнатмасини тайёрлашда унга бир неча дона саримсоқ қўшиб юборилади.
Гуруч ва унни, гўшт ва балиқни яхши сақлаш учун ҳам уларга саримсоқ қўшиб қўйиш мумкин. Бу янги помидор ва бодрингларга, сабзи ва меваларга хҳм тегишли. Агар қулупнай, карам, помидор ва картошка эгатлари ораларига саримсоқ экилса, бу уларни турли хил касалликлардан химоя қилади. Агарда саримсоқ қайнатмаси билан мевали дарахтлар ва турли хил ўсимликлар плантациялари (олма, олча, нок, олхўри, гуллар ва сабзавотлар) пуркалса, бу уларни турли хил зараркунандалар хамда касалликлардан самарали химоя қилади.