J. A. Qarshiyev innovatsion-pedagogik faoliyatni tashkil etis

6. Avtoritar qobiliyati - bu talabalarga bevosita emotsional - irodaviy ta'sir etib, ularda obro‘ orttira bilishdan iborat qobiliyatdir.
Avtoritar qobiliyat o‘qituvchining rostgo‘yligi, irodaviy uddaburonligi, o‘zini tuta bilishi, farosatliligi, talabchanligi kabi irodaviy hislatlari hamda qator shaxsiy hislatlarga, shu bilan birga talabalarni ta'lim-tarbiyasida javobgarlikni his etish, uning e'tiqodi, talabalarga ma'naviy va ma'rifiy e'tiqodni singdira olganligiga ishonchi kabi hislatlarga ham bog‘liqdir. 7. Kommunikativ qobiliyati - bu talabalar bilan muloqotda bo‘lishga, talabalarga yondashish uchun to‘g‘ri yo‘l topa bilishga, ular bilan pedagogik nuqtai-nazardan maqsadga muvofiq o‘zaro aloqa bog‘lashga pedagogik taktning mavjudligiga qaratilgan qobiliyatdir.
Pedagogik takt psixologiyasini o‘rganishda psixolog I.V.Straxov benihoyat katta hissa qo‘shgan. Uning fikricha, bunda muhimi -talabalarga ta'sir etishning eng qulay usullarini topa bilish, tarbiyaviy ta'sirni qo‘llashda maqsadga muvofiq pedagogik choralarga e'tibor berish, aniq pedagogik vazifalarni hisobga olish, talaba shaxsining psixologik xususiyatlari va uning imkoniyatlari hamda mazkur pedagogik holatlarini hisobga olish zarurdir.
Pedagogik taktning yaqqol ifodalaridan biri - har qanday pedagogik ta'sirga nisbatan qo‘llaniladigan chora-tadbirlarni (rag‘batlantirshp, jazolash, pand-nasihat) his eta bilishdan iboratdir. Farosatli o‘qituvchi talabalarga e'tibor berib, ziyraklik bilan qaraydi, ularning individual psixologik xususiyatlari bilan hisoblashadi.
Pedagogik taktning yo‘qligi ko‘pincha og‘ir oqibatlarga olib keladi. O‘qituvchining pedagogik takti masalasi munosabati bilan shuni ham aytish joizki, qachon talabalar o‘qituvchining ijobiy hislatlari to‘g‘risida gapirar ekanlar, ular hamisha o‘qituvchining adolatliligi kabi hislatlarini birinchi o‘ringa qo‘yadilar.