Искусство — %мирим

Жолмурза Аймурзаев
Мен театрға кирген жыллары Жолмурза Аймурзаев редакцияда ислейди екен. Ол театрға тез-тез пьесалары менен қатнасып жүрди.
Қызларды көрсе жаным, баўырым, қара көзим, деп жабыса беретуғын әдети бар еди. Бирақ, маған ондай етпеди. Мен де оған күле шырай бермедим. Мениң қасымда Қалжан Муқанова деген қыз бар еди. Сол қызға жаным, баўырым деп көп айтар еди. Театрдан бизлер қайтқаннан Жолмурза тайын болады. Жаным-баўырым, деп Қалжанға сөз салады. Бизлер жатақханада болатуғын едик. Төрткүлдеги казармада жатамыз. Булар қыдырып жүре береди. Мен жайға кетейин десем Қалжан жибермейди. Кетпейин десем, үстимде оңлы кийим де жоқ, тоңып баратырман. Жолмурза жигит ўақтында көп сөйлейтуғын, шоқ жигит еди.
Дәслеп оның «Палўан қыз» деген қосығын, кейин «Бағман қыз», «Қызкеткен» тағы басқа қосықларын айттым. Жолмурзаның «Өз таяғы өзине», «Раўшан», «Шеберханның шырмаўығы»нда, «Айгүл Абат» пьесаларында баслы роллерде ойнадым.
Жолмурза Аймурзаев үлкен жазыўшы, атақлы драматург. Оның творчестволық табыслары мени қуўандырады.


Сапар Хожаниязов
Сапар Хожаниязов бизиң театрға 1934-жылы келди. Сол жыллары жақсы қосық айтатуғын жигитлер аз еди. Сапар ағаға «Бағдагүл» пьесасындағы Хожан роли берилди. Мен Бағдагүл, ол Хожан болып, азырақ ўақыт сахнада ойнадық. Көп узамай ол Москваға театр институтына оқыўға кетти. Оны да жақсы питкерип келди. Роллерде ойнады. Драматург, белгили жазыўшы болып жетисти, көп жыл театрда директор, парторг, режиссер, актер болып иследи. Минези де жақсы талантлы адам еди. Оны республиканың искусство жулдызларының бири, десек болады.
Мен оның пьесаларында баслы роллерде ойнадым, қосықларын да айттым.


Мырзағалий Дәрибаев
Мырзағалий Дәрибаев жүдә искер, талантлы, тынбайтуғын, мийнет сүйгиш, Ўатанымыздың жетискенликлерин қосықларында, пьесалары менен поэмаларында жырлап, тез өсип киятырған әжайып талант ийеси еди. Арадан ерте кетти. Мен оның қосықларын айттым. Мырзағалийдиң «Көклен батыр» пьесасында Айпара ролинде ойнадым.