International Accounting Standard 19

Соф белгиланган нафақа мажбуриятини (активини) қайта баҳолаш
127 Соф белгиланган нафақа мажбуриятини (активини) қайта баҳолаш қуйидагиларни қамраб олади:
(a) актуар фойда ва зарарлар (128 ва 129-бандларга қаранг);
(б) тизим активлари бўйича фойда (130-бандга қаранг), бунда соф белгиланган нафақа мажбурияти (активи) бўйича соф фоизга киритилган суммалардан ташқари (125-бандга қаранг); ва
(в) активнинг юқори чегарасининг таъсиридаги ҳар қандай ўзгариш, бунда соф белгиланган нафақа мажбурияти (активи) бўйича соф фоизга киритилган суммалардан ташқари (126-бандга қаранг).
128 Актуар фойдалар ва зарарлар актуар фаразлардаги ўзгаришлар ва тажрибавий тузатишлар ҳисобига белгиланган нафақа тўлаш мажбуриятининг келтирилган (дисконтланган) қийматидаги кўпайишлар ёки камайишлардан юзага келади. Актуар фойдалар ва зарарларнинг сабаблари, масалан, қуйидагиларни ўз ичига олади:
(a) ходимлар қўнимсизлигининг, эрта пенсияга чиқишнинг ёки ўлим даражасининг ёки маошлардаги, нафақалардаги (агарда тизимнинг расмий ёки кўзда тутилган шартлари инфляцион нафақа ошишларини таъминласа) ёки тиббий харажатлардаги кўпайишларнинг кутилмаган юқори ёки паст даражалари;
(б) нафақа тўлови опционларига тегишли ўзгаришларни фаразларга таъсири;
(в) келгуси ходимлар қўнимсизлигининг, эрта пенсияга чиқишнинг ёки ўлим даражасининг ёки маошлардаги, нафақалардаги (агарда тизимнинг расмий ёки кўзда тутилган шартлари инфляцион нафақа ошишларини таъминласа) ёки тиббий харажатлардаги кўпайишларнинг баҳоларидаги ўзгаришлар таъсири; ва
(г) дисконт ставкасидаги ўзгаришлар таъсири.
129 Актуар фойдалар ва зарарлар белгиланган нафақа тизимини киритиш, ўзгартириш, қисқартириш ёки ҳисоб-китоб қилиш ҳисобига ёки белгиланган нафақа тизими асосида тўланадиган нафақаларга ўзгартиришлар ҳисобидан юзага келадиган белгиланган нафақа мажбуриятининг келтирилган (дисконтланган) қийматидаги ўзгаришларни ўз ичига олмайди Бундай ўзгаришлар олдинги хизмат қийматига ёки ҳисоб-китоб бўйича фойдалар ёки зарарларга олиб келади.
130 Тизим активлари бўйича фойдани аниқлашда, тадбиркорлик субъекти тизим активларини бошқариш харажатларини ва тизимнинг ўзи томонидан тўланадиган солиқни чегиради, бунда белгиланган нафақа тўлаш мажбуриятини ҳисоблашда фойдаланилган актуар фаразларда инобатга олинган солиқдан ташқари (76-банд). Бошқа маъмурий харажатлар тизим активлари бўйича фойдадан чегирилмайди.