Iii bob. Avtomobillarda yo‘lovchilar tashishni boshqarish тayanch so‘zlar va iboralar

3.8. Avtobuslarning ishga chiqishini tashkil etish
Yo‘lovchilar oqimini (kunning soatlari, hafta kunlari, oylar, yil fasllari…) bo‘yicha notekis taqsimlanishi, yo‘l va boshqa sharoitlarning o‘zgarib turishi yo‘nalishlarda ishlayotgan avtobuslarning ish soatlarini bir-biridan farq qilishiga olib keladi. Bu esa korxonadgi haydovchilarning oylik ish kunlari va soatlarini ham bir-biridan keskin farq qilishiga olib keladi. Avtobuslarni ishga chiqishini har bir haydovchining mehnati va dam olishini hisobga olib tashkil etish zarur bo‘ladi. Avtobuslarni ishga chiqarishni tashkil qilish uchun avtobus saroyining tasarruf xizmati bo‘limi dastlab barcha yo‘nalishlarda va buyurtma bo‘yicha safarga chiqarilishi rejalashtirilgan avtobuslarning bir kunlik talabnomasi bilan tanishib chiqadi. Nozim nazorat chiqarish punkti navbatchi mexanigi bilan birgalikda safarga chiqishi kerak bo‘lgan va rezervdagi avtobuslarning texnik tayyorgarlik holatini aniqlaydi.
Har bir yo‘nalish bo‘yicha avtobuslarga chiptachilar va rezerv haydovchilarining taqsimlanishini, avtobuslarni safarga chiqarishga bog’liq farmoyishlarni o‘rganadi. Nozimlik xizmatida yo‘l varaqasi va boshqa xujjatlar bilan tanishadi. Nozim oldingi kungi nozimlik hisobotini, avtobuslar harakat muntazamligini, har bir yo‘nalish bo‘yicha tashish hajmining bajarilishini o‘rganib chiqadi. Shuningdek, avtobus yo‘nalishlari va avtosaroy bo‘yicha oylik rejaning bajarilishining ahvoli bilan tanishadi. Avtosaroy texnik xizmat navbatchisi avtobusning haqiqiy saroydan chiqish vaqtini yo‘l varaqasiga belgilaydi.
Qabul qilingan nozimlik xizmati nizomiga muvofiq avtosaroy navbatchi nozimi muntazam ravishda markaziy nozimlik bosh bekatining bosh yoki katta nav­batchi nozimiga avtobuslarning safarga chiqarilish haqidagi ma’lumotni beradi.
Saroy nozimi avtobuslarning yo‘nalishdagi harakatini va ishini nazorat qiladi. Shaharlarda avtobus bosh bekati bo‘yicha navbatchi nozim avtobusning bosh bekatga kelish vaqti haqidagi ma’lumotni saroy nozimiga yetkazadi.
Avtobuslarning safardan vaqtdan oldin qaytib kelgan, holatlarida yo‘l varaqasiga haqiqiy qaytib ke­lish vaqti belgilanadi. Bu haqda nozimlik kun hisobotida ma’lumot beriladi. Nozim safardan qaytib kelgan avtobuslar o‘rniga rezervdan avtobus jo‘natadi. Avtobuslarni safarga harakat jadvalida ko‘rsatilgan vaqtda chiqariladi.
Nozim ish kunining oxirida yo‘l varaqasiga va nozimlik kun jurnaliga avtobuslarning saroyga haqiqiy qaytib kelish vaqtini qayd qiladi. Avtosaroy nozimlik xizmati xonasida avtobuslarning safarda, saroyda va texnik xizmat ko‘rsatishda ekanligi to‘g’risidagi ma’lumotlar maxsus nozimlik ko‘zgusida aks ettiriladi.
“Avtomobillarda yo‘lovchilar tashishni boshqarish” bobi bo‘yicha yuqorida keltirilganlardan kelib chiqib quyidagilarga e’tibor qaratish lozim:
nozimlik boshqaruvi tizimini yo‘lovchilarni tashish jarayoniga joriy etish xizmat ko‘rsatish sifatini oshirishga xizmat qiladi. Tizimga zamonaviy axborot-kommunikatsiya texnologiyalarini joriy etish yo‘nalishlarda jamoat transporti harakatini boshqarish samaradorligini yanada oshiradi.
dunyoning rivojlangan davlatlari yirik shaharlarida aholining jamoat transportidan foydalanish darajasi yuqori ko‘rsatkichga ega. O‘zbekistonning 30 ta shahar tasnifiga ega hududlarida, shuningdek aholi zich joylashgan tumanlarida jamoat transportlariga “GPS” tizimini o‘rnatib, markaziy nozimlik xizmatini joriy etish orqali xizmat ko‘rsatish sifati hamda aholining jamoat transportidan foydalanish darajasini oshirishga erishsih mumkin.