Ii. Боб Фуқаро ва ишлаб чиқаришга мўлжалланган биноларнинг ёнғин хавфсизлиги

Шишувчи бўёқлар. Металл конструкцияларни оловдан ҳимоялашни ривожланаётган воситаларидан бири шишувчи бўёқлар ҳисобланади. Улар конструкциялар сиртига юпқа қатлам билан суртилади. Тахминан 179 ⁰С ҳароратда бўёқ шишади ва термоизоляцион қатлам ҳосил қилади, унинг қалинлиги бир неча см ни ташкил этади. Иссиқлик ўтказувчанликни пастлиги ҳисобига шишувчи қатлам металлни тез қизишини олдини олади. У органик ва ноорганик моддалардан тузилган кўп фазали тизимни ўз ичига олган. Ёпиқ ячейкаларда азот ва углерод-II оксид гази сақланади. Металл сиртига бўёқни икки-уч қатламда суртилади. Бир қатламда суртиш конструкцияни бўёқни шишиши жараёнида ҳосил бўлиши мумкин бўлган ёриқлардан сақлайди. Шишувчи бўёқлар пўлат ва алюминий конструкцияларга, уларни оловга бардошлик чегарасини ошириш мақсадида ишлов бериш учун мўлжалланган. Бўёқларни ривожланган сирт учун ишлатиш тавсия этилади (колонналар, тўсинлар, ромлар). Уларни намлиги 80 % дан ошмайдиган агрессив буғлар, газлар бўлмаган ва 35⁰С дан ошмайдиган ҳароратдаги ёпиқ хоналарда қўллаш тавсия этилади. Намлик юқори бўлган шароитларда фойдаланиш учун комплекс таркиблар қўлланилади: коррозияга қарши қоплама, бир вақтнинг ўзида декоратив қоплаш вазифасини бажарувчи шишувчи бўёқ ва намдан ҳимоя материали.
ВПМ-2 шишувчи бўёғи – полимер боғловчиларни сувли эритмасидаги толали ва термочидамли газ ҳосил қилувчи тўлдирувчилар аралашмасини ўз ичига олган. Композиция ММ-50 сақичи, карбоксиметилцеллюлоза, аммофос, дициандиамид, асбест ва бошқ. ташкил топган.
Вермикулит асосидаги таркибга суюқ шиша, вермикулит, мочевиноформальдегид сақичи, рух (цинк) оксиди, асбест, дициандиамид, кремнефторли натрий киради.
«Экран» бўёғини бошланғич композицияси мочевиноформальдегид сақичи, суюқ шиша, дициандиамид, рух оксиди, перлит ва асбестдан ташкил топган. Унинг камчилиги бу, ёпишиш хусусиятининг пастлигидир. Шу сабабли суртишдан олдин ҳимоя этилаётган сиртни нотекис (ғадир) қилиш, анкер моякларни ўрнатиш тавсия этилади. Лекин, бу иш сиғимини ва оловдан ҳимоялаш маблағларини ортишига олиб келади.
Шишувчи бўёқлар билан ҳимояланган металл элементлар ва ҳақиқий намуналар синалганда, қалинлиги 4-5 мм.га тенг қуруқ қатлам пўлат конструкциянинг оловга бардошлик чегарасини 0,75 соат, алюминий элементни 0,25 соатга етказади. Олов таъсирида аста секин композиция углеродини ёниши ва шишувчи тизимни бузилиши рўй беради.