Ii. Боб Фуқаро ва ишлаб чиқаришга мўлжалланган биноларнинг ёнғин хавфсизлиги

Конструкцияни юк кўтариш лаёқатини йўқотиши – конструкцияни қулаши ёки деформация бўлиши натижасида, ундан кейинчалик фойдаланиб бўлмайдиган ҳолатга келишидир.
Конструкцияни тўсувчанлик лаёқатини йўқотиши – бу конструкциянинг қарама-қарши (орқа) юзасини олов таъсирида критик ҳароратгача қизиши ва ҳароратни ортиши оқибатида қўшни хонага ёнғинни тарқалиши ёки ёнғин маҳсулотларини (тутун, токсин моддалар) ўтказиб юборадиган тешик, ёриқларни ҳосил бўлишидир.
Конструкцияни қизимайдиган юзасини критик ҳароратгача қизиши - иссиқликни изоляция қилиш (кейинчалик иссиқликни сақлаш) хусусиятини, тешик ва ёриқларни ҳосил бўлиши эса – яхлитликни йўқотилишига олиб келади.
Ёнғин оқибатида конструкциядаги иссиқликни сақлаш хусусиятини йўқотиш аломати, қизимайдиган юзада ҳароратни ўртача 160⁰С гача кўтарилиши ёки бу юзани исталган нуқтасида ҳароратни бошланғич ҳароратга қараганда 190⁰С гача кўтарилиши ёки конструкциянинг бошланғич ҳарорати қандай бўлишидан қатъий назар 220⁰С гача қизишидир.
Конструкцияларнинг иссиқликни сақлаш хусусиятини ва яхлитлигини йўқотиши, фақатгина ички тўсувчи конструкциялар оловга бардошлилигини баҳолашда ҳисобга олинади.
Конструкцияни тўсиш хусусиятини йўқотиши маҳкамланган боғларни узилиши (панел деворларни маҳкамланган боғларини узилиши билан ҳам) билан рўй бериши мумкин. Одатда маҳкамланган боғларни узилиши, конструкцияни деформация бўлиши ёки қулашига олиб келади. Бу аломат конструкцияларнинг функционал вазифасидан қатъий назар барча қурилиш конструкцияларни оловга бардошлилигини баҳолашда эътиборга олинади.
Қурилиш конструкцияларининг оловга бардошлилик чегараси ҳақиқий ва талаб этиладиган оловга бардошлилик чегараларига бўлинади.
Мавжуд бўлган ёки лойиҳалаштирилган конструкцияларнинг оловга бардошлилик чегарасини ҳақиқий (П_ф), меъёрий ҳужжатлар асосида ёки хавфсизлик шартлари бўйича белгиланадиган оловга бардошлилик чегарасини талаб этиладиган (П_т) деб номлаш қабул қилинган. Қурилиш конструкцияларнинг оловга бардошлилигини ҳақиқий ва талаб қилинадиган чегаралари меъёрланади. Улар бинолар ва иншоотларни лойиҳалашда ҳисобга олиниб, П_ф > П_т ҳолда хавфсизлик шарти бажарилган деб ҳисобланади.