Ichki ishlar idoralari xodimlarining

Takrorlash uchun savol va topshiriqlar

1. 
   Kasb axloqi kategoriyalari deb nimaga aytiladi va ularning qaysilarini bilasiz?
   
2. 
   Axloq kategoriyalari qanday vazifalarni bajaradi?
   
3. 
   Yaxshilik va yomonlik deganda nimani tushunasiz?
   
4. 
   Muhammad Zehniy: «Yaxshi odam ushbu dunyoni tark etsa-da, biroq u tirik hisoblanadi. Yomon odam tirik bo‘lsa-da, baribir o‘lik qatoridadir», – degan hikmatli so‘zlarining ma’nosi to‘g‘risida fikr yuriting.
   
5. 
   Or-nomus, qadr-qimmat, vijdon deganda nimalarni tushunasiz?
   
6. 
   «Qonunlar qonuni vijdondir» (A.Lamartin), «Oliy hukm vijdon hukmidir» (V.Gyugo) degan fikrlarga munosabat bildiring.
   

2. bob

ICHKI ISHLAR IDORALARI XODIMLARI KASB ESTETIKASINING KATEGORIYALARI
1-§. ESTETIKA KATEGORIYALARI, ULARNING MOHIYATI VA AHAMIYATI
Kasb estetikasi kategoriyalari. Estetika fani o‘zining bir qancha kategoriyalariga ega bo‘lib, ular turli kasb egalarining faoliyatida turlicha ahamiyat kasb etadi. Demak, estetika fanining kategoriyalari go‘zallik olamini idrok etuvchilar va uni maqsadga muvofiq tarzda o‘zgartiruvchilar uchun metodologik vazifani o‘taydi.
Ichki ishlar idoralari xodimlari kasb estetikasining kategoriyalari deb ularning voqelikka estetik munosabatlarining, estetik ong va estetik faoliyatlarining eng muhim, zaruriy tomonlarini o‘zida aks ettiruvchi eng umumiy tushunchalarga aytiladi.
Nafosat. Ichki ishlar idoralari xodimlari kasb estetikasi kategori- yalarining asosini «nafosat» kategoriyasi tashkil etadi. «Nafosat» – narsa va hodisalarning umumiy estetik tomonlarini o‘zida aks ettiruvchi tushuncha bo‘lib, birinchidan, tabiat, jamiyat hamda insonning moddiy va ma’naviy yaratuvchanlik faoliyatida obyektiv ravishda mavjud bo‘lgan nafosatni; ikkinchidan, olamni go‘zallik qonunlari asosida o‘zgartiruvchi ijodiy estetik faoliyatni; uchinchidan, estetik ongni qamrab oladi.
Nafosatning muhim xususiyatlarini me’yor, uyg‘unlik, mukammallik tashkil etadi.
Estetik me’yor. Estetik me’yor tabiat va jamiyatdagi narsalar, voqea- hodisalarning ichki va tashqi, umumiy va xususiy tomonlarini, ulardagi mohiyat va hodisa, mazmun va shakl hamda barcha qarama-qarshiliklarni bir butun holda ifoda etish, ularning bir holatdan ikkinchi holatga aylanish joyini tutashtirib turuvchi sistemali, substansiyali o‘lchovdir.
Ongli mavjudot bo‘lgan inson o‘zini qurshab turgan voqelikka muno- sabatida har bir narsaga o‘ziga xos mezon nuqtai nazaridan yondashadi va shu asosda voqelikni nafosat qonunlari bo‘lmish miqdoriylik va sifatiylikning me’yori darajasida o‘zgartiradi.