I semester 1-mavzu: “Jahon arxivlari tarixi va horijiy mamlakatlarda arxiv ishi tarixi” fanining maqsad va vazifalari Reja: Insoniyat taraqqiyotida arxivlarning o‘rni va roli.
Zamonaviy dunyoda arxivlar va ularning ahamiyati
Xorijiy arxivlar tarixining tarixshunosligi va manbashunosligi.
Insoniyat taraqqiyotining muayyan bosqichida xo’jalik va ijtimoiy munosabatlarning rivojlanishi ibtidoiy jamoa tuzumining yemirilishiga hamda davlatchilikning vujudga kelishiga olib keldi. Deyarli bir vaqtda ijtimoiy zarurat tufayli yozuv ham paydo bo’ldi. Qadimgi davlatlar ijtimoiy funksiyalarini bajarish jarayonida turli hujjatlar (qonunlar, farmonlar, mulk va soliq hisobotlari va h.) yaratish hamda ularni saqlashga ehtiyoj sezdilar. Shu tariqa hujjatlarni saqlaydigan muassasalar - arxivlar paydo bo’ldi.
“Arxiv” atamasi lotincha “arxivum” so’zidan olingan bo’lib, o’zbek tilida “mahkama”, “muassasa” degan ma’noni anglatadi. Lekin bu so’z hozirgi kunda boshqacha ma’noda qo’llaniladi. Arxiv deganda biz odatda hujjatlar saqlanadigan muassasani tushunamiz. Ayni paytda biron-bir tashkilot yo’ki jismoniy shaxslar qo’lida to’plangan hujjatlar majmuiga nisbatan ham “arxiv” atamasi qo’llaniladi.
Qadimgi dunyo va o’rta asr davlatlarida arxivlar tashkil etilib, bu yerda turli hujjatlar saqlangan. Ammo yangi zamonda arxivlarda saqlanayotgan hujjatlar sonining keskin oshganligi tufayli ularni saqlash va foydalanish bilan bog’liq ishlar tobora murakkablashib bordi. Natijada hujjatlarni hisobga olish, ularni bir tizimga solish, saqlash va ulardan foydalanishning yangi-yangi usullarini ishlab chiqish va ularni amalda qo’llash zarur bo’lib qoldi. Bu hol “arxivshunoslik” deb atalmish ko’makchi tarix fanining paydo bo’lishiga olib keldi.
Arxivshunoslik -bu arxivlar faoliyatining nazariy, huquqiy va uslubiy masalalarini hal etishga qaratilgan fandir. U arxivlar faoliyati bilan bog’liq barcha muammolarni kompleks tarzda o’rganadi. Arxivshunoslik quyidagi asosiy tarkibiy qismlarga bo’linadi:
arxiv ishi tarixi va arxiv ishlarini tashkil etish;
arxiv huquqi;
arxivshunoslik nazariyasi va uslubiyoti;
arxeografiya;
arxiv menejmenti;
arxiv statistikasi;
arxivlarda axborot texnologiyalari.
Ilk o‘rta asrlarda G‘arbiy Yevropada qirollar, yirik feodallar va monastirlarning arxivlari vujudga keldi. Ularning orasida eng yirigi V asrda tashkil etilgan Vatikan arxivi hisoblanadi. Vatikan arxivi hozirgi kunda ham mavjud bo‘lib, bu yerda yevropaning o‘rta asrlar tarixini o‘rganish uchun zarur bo‘lgan nodir va qimmatli hujjatlar majmuasi saqlanmoqda.
Yevropada markazlashgan davlatlarning tashkil topishi va rivojlanishi natijasida mayda arxivlarning yiriklashish jarayoni kuzatiladi. Qirollar arxivlari bo‘ysundirilgan feodallarning arxivlari hisobiga kengayib bordi. Qirollar arxivlari g‘oyat maxfiy tarzda saqlanar edi. yevropada qirolik hokimiyatining kuchayishi va umumdavlat boshqaruv muassasalarining shakllanib borishi natijasida muassasa arxivlari paydo bo‘ldi. Muassasa arxivlarining faoliyati o‘zaro bog‘lanmaganligi oqibatida hujjatlar nihoyatda tarqoq holda saqlanar edi.
XVIII-XIX asrlardagi burjua inqiloblari arxiv ishlarida tub o‘zgarishlarga olib keldi. Burjuaziya qator mamlakatlarda arxiv ishlarini markazlashtirdi. Arxivlarni boshqarish uchun maxsus muassasalar ta'sis etildi. Masalan, 1794 yilda Fransiyada Konvent maxsus dekret qabul qilib, markaziy davlat arxivini tashkil etdi. Mazkur arxivga umumdavlat boshqaruv organlarining hujjatlarini topshirish shart etib qo‘yildi. Joylardagi davlat organlari hujjatlari departamentlar arxivlariga topshirilishi shart edi. Fransiyada arxiv ishi sohasidagi bu islohot qator boshqa davlatlar uchun namuna bo‘ldi. Ular ham Fransiya singari davlat arxiv tizimini yaratdilar. Lekin Angliya va AQSh singari mamlakatlarda o‘sha vaqtda ham, hozir ham yagona davlat arxiv tizimi barpo qilinmadi. Bu yerdagi markaziy, viloyat va shahar arxivlarining har biri mustaqil ravishda faoliyat ko‘rsatib kelmoqda.
XIX asrda qator Yevropa mamlakatlari va AQShda arxivlarining eshiklari tadqiqotlar uchun ochildi. Natijada arxiv hujjatlaridan ilmiy maqsadlarda foydalanish va ularni nashr etish imkoniyati paydo bo‘ldi. Ko‘p mamlakatlarda maxsus arxivshunos kadrlarni tayyorlash yo‘lga qo‘yildi. 1821 yilda Fransiyada ilk arxiv instituti – Xartiyalar maktabi ochildi.
Hozirgi kunda jahonnning barcha mamlakatlarida minglab arxivlar faoliyat ko‘rsatmoqda. Ularning orasida har bir davlatning markaziy (yoki milliy) arxivlari o‘zlarining noyob hujjatlarga boyligi bilan ajralib turadi. Londondagi Davlat arxivi, Parijdagi Milliy arxiv, Rimdagi Markaziy davlat arxivi, Koblens shahridagi Federal Arxiv (GFR), Vashingtondagi Milliy arxiv, Moskvadagi Rossiya Markaziy davlat arxivi, Dehlidagi Milliy arxiv, Qohiradagi Markaziy davlat arxivi jahondagi eng yirik arxivlar qatoriga kiradi.
O‘zbekiston arxivlari jahondagi eng yirik arxivlar bilan yaqindan aloqa o‘rnatganlar. Masalan, 2003 yilda O‘zbekiston Respublikasi Vazirlar Mahkamasi huzuridagi Bosh Arxiv boshqarmasi AQShning Xolokast yodgorligi kengashi va uning Vashingtondagi muzeyi o‘rtasida arxiv sohasi bo‘yicha bitim imzolandi.
Hozirgi kunda arxivlar butun jahon miqyosida o‘z faoliyatlarini muvofiqlashtirib, hamkorlik qilmoqdalar. 1948 yilda YuNeSKO qoshida Xalqaro Arxiv Kengashi tashkil etildi. O‘zbekiston arxiv muassasalari ham mazkur xalqaro tashkilotning a'zosidir. Xalqaro Arxiv Kengashi turli davlatlar arxivlari o‘rtasida aloqalarni yo‘lga qo‘yish, hujjatlarni saqlash va ularni himoya qilish borasida katta ishlarni amalga oshirmoqda. Bu xalqaro tashkilot 1981 yildan boshlab “Archivum” nomli jurnal nashr etmoqda. Parijda arxivshunoslarning xalqaro kursi faoliyat ko‘rsatmoqda.
Yangi zamonda arxivlarda saqlanayotgan hujjatlar sonining keskin oshganligi tufayli ularni saqlash va foydalanish bilan bog‘liq ishlar tobora murakkablashib bordi. Natijada, hujjatlarni hisobga olish, ularni bir tizimga solish va ro‘yxatga olishning yangi-yangi usullari ishlab chiqildi va amalda qo‘llanildi. Shu tariqa arxivshunoslik fani paydo bo‘ldi.
