I. Полимерларнинг тузилиши ва хоссалари

II.4. Полимер молекулаларининг ўзаро таъсирлашиши

Молекуляр массаси 5*10⁶ бўлган полимер занжирида тахминан 10⁶ атом бўлиб, унинг контур узунлиги диаметридан 6-7 минг марта катта бўлади. Бундай макромолекулаларнинг ўзаро таъсирлашиши, улар таркибидаги атомлар, элементар гуруҳлар фаоллигига, занжирларнинг конформацион ҳолатига ва улар орасидаги масофага ниҳоятда боғлиқ бўлади. Шу туфайли макромолекулаларнинг ўзаро таъсирлашишлари турли хил ва уларнинг энергияси ҳам турлича бўлади. Бу ҳол II.4.1- расмда ифодаланган. Боғланиш чизиқларининг бундай ўзгариши макро-молекулаларнинг конденсирланган ҳолатидаги тортишиш кучини, уларнинг бир-бирига тўлиқ устма-уст бирикишига қаршилик қилувчи итариш кучига нисбати билан ифодаланади. Молекулалар орасидаги масофанинг ортиб бориши билан улар ўртасидаги итариш кучи, тортишиш кучига нисбатан тезроқ камаяди. Ўзаро таъсирлашиш кучлари батамом тугатилганда макромолекулалар изоляцияланган деб ҳисобланади.

II.4.1- расм. Макромолекулаларнинг ўзаро таъсирлашиш энергиясини (Е) масофага (r) боғлиқлиги:
1 - ковалент боғ;
2 - водород боғ;
3 - Ван-дер-ваальс ўзаро таъсирлашиш

Макромолекулалар ўртасида шундай r_o масофа мавжуд бўладики, унда тортишиш ва итариш кучлари бир-бирига тенглашиб, ўзаро таъсирлашиш озод энергияси минимум миқдорга эга бўлади. Бундай минимал энергия 2-40 кЖмол интервалда бўлиб, у ковалент (кимёвий) энергиялар миқдоридан бир тартибга кичикдир. Одатда макромолекулалараро таъсир этувчи кучлар табиати уларнинг кимёвий тузилишига боғлиқ бўлади ва уларни бир неча гуруҳга ажратилади. Улар ҳақидаги асосий маълумотлар II.4.1-жадвалда келтирилган. Ориентацион ўзаро таъсирлашишлар одатда қутбланган макромолекулалар орасида бўлади ва бир хил зарядланган элементар қисмлар бир-биридан максимал узоқлашади.

II.4.1-жадвал

Макромолекулаларнинг ўзаро таъсирлашиш турлари,
уларнинг боғланиш энергияси ва узунликлари