I bob. Mumtoz adabiyot tarixida yaratilgan e’tiqod va fiqhga oid asarlarning oʻziga xos oʻrni

Tadqiqot obyekti va predmeti. X-XIX asrlar mobaynida Movarounnahr diyorida shakllangan fiqh ilmining tarixiy ildizlari, diyorimizda yaratilgan diniy-ta’limiy va fiqhiy asarlarning ahamiyati, ularning bugungi kundagi holati, shuningdek, Alisher Navoiyning “Siroj ul-muslimin” hamda Zahiriddin Muhammad Boburning “Mubayyin dar fiqh” asarlariga oid manbashunoslik jihatidan tahlil qilish masalalari tadqiqot obyekti hisoblanadi.
Tadqiqot predmeti esa “Siroj ul-muslimin” va “Mubayyin dar fiqh” asarlarida diniy-falsafiy qarashlarining ilmiy ijodida namoyon bo‘lish xususiyatlari, ularning o‘ziga xos jihatlari va ilmiy ahamiyati, bu ikki asarning o‘xshash va farqli jihatlarini manbashunoslik, lingvistik-tarjimashunoslik hamda diniy nuqtayi nazardan o’rganishdan iborat.
Tadqiqot maqsadi va vazifalari. Tadqiqot ishining asosiy maqsadi – Movarounnahr diyorida X-XV asrlarda mavjud fiqhiy ilm tarixini o‘rganib, Alisher Navoiyning “Siroj ul-muslimin” hamda Zahiriddin Muhammad Boburning “Mubayyin dar fiqh” asarlarini o‘zaro tahlil qilish hamda ularda mavjud o‘xshash va farqli jihatlarni tadqiq qilishdan iborat. Ushbu maqsaddan kelib chiqqan holda quyidagi asosiy vazifalarni belgilash mumkin:

• 
  Mumtoz adabiyot tarixida yaratilgan e’tiqod va fiqhga oid asarlarning oʻziga xos oʻrnini aniqlash;
  
• 
  X-XIV asrlarda yozilgan diniy-didaktik asarlar hamda XVI-XIX asrlarda ijod qilgan diniy-ta’limiy ijod namunalarini jamlash hamda ularning tarixiy-manbaviy ahamiyatini belgilash;
  
• 
  Temuriylar davrida fiqh ilmining nazariy va amaliy asoslarini tarixiy nuqtayi nazardan ko‘rsatib berish;
  
• 
  Temuriylar davridagi tuzilgan, ko‘chirilgan va turkiy tilda yozilgan fiqhiy-ta’limiy asarlarni aniqlash;
  
• 
  Alisher Navoiy ilmiy merosida “Sirojul muslimiyn” asarining o‘ziga xos o‘rnini belgilash;
  
• 
  Zahiriddin Muhammad Boburning “Mubayyin dar fiqh” asari orqali XV asr fiqhiy masalalariga murojaat qilish;
  
• 
  “Siroj ul-muslimin” va “Mubayyin dar fiqh” asarlarining qiyosiy tadqiqini amalga oshirish;
  
• 
  “Siroj ul-muslimin” va “Mubayyin dar fiqh” asarlarining qoʻlyozmalari va o‘rganilganlik holatini ilmiy o‘rganish;
  
• 
  “Siroj ul-muslimin” va “Mubayyin dar fiqh” asarlari bayonidagi oʻxshash va farqli jihatlarini aniqlash.