Глоссарий жисмоний маданият

Умумий жисмоний тайёргарлик - турли фаолият турларида муваффақиятга эришишнинг дастлабки шарти бўлиб, жисмоний ривожланиш даражасини, кенг қамровли ҳаракат тайёргарлигини оширишга йўналтирилган тайёргарликдир.

Махсус жисмоний тайёргарлик - ихтисослаштирилган жараён бўлиб, инсоннинг ҳаракат қобилиятларига махсус талаблар қўядиган, аниқ бир фаолият турида (касб, спорт тури ва ҳ.к.) муваффақиятга эришишга кўмаклашувчи тайёргарлик туридир.

Жисмоний таълим - жисмоний машқларни бажаришга оид махсус назарий билимлар ва уларни лозим бўлганда турмушда қўллаш маҳорати ва кўникмаларини ўз ичига қамраб олади.

Жисмоний ривожланиш - инсон организмининг индивидуал ҳаёти давомида морфофункционал ҳолатининг табиий ҳолда ўзгариши жараёнидир.

Жисмоний камолот - тарихан белгиланган ва ҳаётий талабларга оптимал тарзда мувофиқ бўлган инсоннинг идеал жисмоний ривожланганлик ва тайёрланганлигидир.

Спорт – шахс ва жамият маданиятининг махсус фаолияти ҳисобланиб, рақобат ва беллашув шароитида инсоннинг ҳаракат имкониятларини очишга йўналтирилган жараёндир.

Спорт – жисмоний маданиятнинг таркибий қисми ҳисобланиб, мусобақа фаолияти, мусобақаларга махсус тайёрланиш ва шахслараро ўзига хос муносабатлардир.

Жисмоний рекреация – жисмоний маданиятнинг бир тури бўлиб, одамларнинг фаол дам олишлари, ушбу жараёндан кайфиятларини кўтаришлари, бир фаолият туридан бошқасига ўтишлари, меҳнат, турмуш, спорт ва ҳарбий фаолиятлардан чалғиш мақсадида жисмоний машқлар ва спорт турларининг енгиллаштирилган шаклларидан фойдаланиш.