Физикавий кимё фанидан

Криоскопик усулда модданинг молекуляр
массасини аниқлаш

Ишнинг мақсади. Эриган модданинг молекуляр массасини криоскопик усулда аниқлаш йўли билан амалда танишиш.

Керакли асбоб ва реактивлар. Криоскопик ўлчашлар учун қурилма; Бекман термометри; -10^оС дан +100^оС гача ўлчайдиган, 0,1^оС шкалаларга эга бўлган термометр; лупа.
Совитувчи аралашма тайёрлаш учун муз ва натрий хлорид; бензол (эритувчи); нафталин ёки бензолда эрийдиган бошқа модда; калий хлориднинг 5 % ли эритмаси.

Қурилманинг тузилиши. Қурилманинг асосий қисми бу ён томонидан учи бор пробирка. Унинг устки учи зич беркитилади ва тиқинидан термометр ва ингичка симдан тайёрланган аралаштиргич туширилади; аралаштиргичнинг пастки учи ҳалқа шаклида буралган. Термометр ва аралаштиргичли пробирка кенгроқ пробирканинг тиқини орқали унинг ичига туширилади. Тўлиқ йиғилган қурилма (7 –расм) тажрибадан олдин қалин деворли стаканга туширилади. Тажриба бошида стаканга совитувчи аралашма солинади.

Ишнинг бажарилиши: Стакан оғзигача совитувчи аралашма билан тўлдирилади. Бўш пробирка 0,01 гр аниқликда ўлчанади ва унинг масса g₁ билан белгиланади. Пробиркага термометрнинг симоби ботгунча эритувчи солинади. Кейин пробирка яна ўлчанади ва масса g₂ билан белгиланади, бунда олинган бензолнинг массаси g = g₂ - g₁. Бензолли пробирка совитувчи аралашмага солиниб аралаштириб турган ҳолда кристаллар тушиб бошлагунча совитилади.
Кристаллар тушиб бошлаган ҳарорат тоза бензолнинг тахминий музлаш ҳарорати деб қабул қилинади.
Кейин бензолли пробирка совитувчи аралашмадан олинади ва қўл билан то кристаллар тўлиқ эриб кетгунча қиздирилади. Кейин бензолли пробирка яна совитувчи аралашмага туширилиб қопқоқ (2) бекитилади ва аралаштириб турган ҳолда t₀+2 градусгача совитилади. Аралаштиришни тўхтатиб пробирка тахминан t₀+0,3 градусгача совитилади. Тезда қалпоқ (4)ни жойига қўйиб унга пробирка (6)жойланади ва бензол 0,5 градусгача совигунча кутилади. Аралаштиргични юқорига ва пастга харакатлантириб ўта совуган бензолни музлашига эришилади. Лупадан фойдаланиб 0,002 град аниқликда термометрнинг максимал кўрсаткичи t₀ белгилаб олинади. Бу ҳарорат бензолнинг ҳақиқий музлаш ҳароратига мувофиқ келади. Кристаллар қайтадан суюқлантирилади ва t₀ қайтадан аниқланади. Аниқлашлар камида уч марта такрорланади. Дастлабки ва кейинги ўлчашлар ўртасида температуралар фарқи 0,02 дан ошмаслигига эришилгач t учун уларнинг ўртача арифметик қиймати олинади.