Физика ва электроника асослари

Elektrodinamik mikrofon

Bu mikrofon doimiy magnit maydon ta’sirida tebranayotgan o‘tkazgichda paydo bo‘ladigan EYuK asosida ishlaydi. Tebranayotgan o‘tkazgich g‘altak membranasiga mahkam yopishtirilgan yupqa metall tasma bo‘lib, u tovush bosimi ta’sirida deformasiyalanadi. Mikrofon ikkita g‘altakdan tashkil topgan bo‘lib, ular har xil xarakteristikalarga ega. Ular birga ishlaganida keng diapazonda chastota xarakteristikasi deyarli doimiy qoladi (37-rasm).

37-rasm.

Pezoelektrik mikrofon

Tovush bosimi segnet tuzidan tashkil topgan pezokristallga ta’sir qilganda, kristall chegaralarida potensiallar ayirmasi hosil bo‘ladi. Pezokristallning metall qoplamalarda 10 mV bar signal paydo bo‘ladi. Bunday mikrofonlarning chastota harakteristikasi yaxshi hisoblanadi.
Temperatura ortishi bilan mikrofon xarakteristikasining buzilishi mazkur mikrofonning asosiy kamchiligi sanaladi. 50°C temperaturada segnet tuzini erishi kuzatiladi va 63°C da bu tuz to‘la eriydi.

Radiomikrofonlar

Bu mikrofonlar ma’lum bir chastotada ishlashga mo‘ljallangan bo‘lib, uning mikrofoniga berilayotgan tovush bosimi EYuK ga aylantirilib, modulyatorga beriladi va efir orqali ma’lum bir radiusga tarqatiladi. Bu tovush signalini tarqatgich chastotasiga sozlangan priyomnik qabul qiladi va uni kuchaytirgichga beradi. Kuchaytirgich chiqishdagi signallarni zarur darajada kuchaytirib, eshituvchilar diqqatiga havola qiladi. Bu mikrofonning afzallik tarafi shundaki, u kuchaytirgichga kabelsiz, radioto‘lqin orqali bog‘lanadi.
Radiomikrofonlarning kamchiligi shundan iboratki, ish jarayonida ta’minot batareykasining energiyasini kamayishi ularning xarakteristikasini o‘zgarishi olib keladi.
Mikrofonlarni to‘g‘ri ishlatish jarayoniga, mikrofon bilan kuchaytirgich orasida joylashgan bog‘lovchi ekranli kabel simining ham katta ta’siri bor. Agar bu kabelning uzunligi va qarshiligi to‘g‘ri tanlab olinmasa, kuchaytirgichning chiqish signali salbiy natijalarni beradi.