Farmasevtikada boshqaruv fanidan o‘quv-uslubiy majmua

Farmasevtika marketingi muhiti – bu farmasevtika tashkilotlari tashqarisida harakatlanuvchi, farmasevtika marketingi xizmati, rahbarlarning o‘zaro manfaatli hamkorlik munosabatlarini o‘rnatish va saqlashga ta’sir etuvchi faol sub’ekt hamda kuchlar majmuasi hisoblanadi. Farmasevtika marketingi muhiti makro va mikromuhitlardan tashkil topadi.
Farmasevtika marketingi muhitini o‘rganish va tahlilni o‘tkazish natijasida farmasevtika bozori strategiyasini aniqlash, uni takomillashtirish yo‘nalishlarini belgilash imkoniyati yaratiladi.
Farmasevtika marketingi muhiti deganda, farmasevtika firma, dori vositalarini ishlab chiqaruvchi muassasalar, farmasevtika korxonalari, ulgurji va chakana dorixonalar farmasevtika faoliyatiga ta’sir ko‘rsatuvchi ijtimoiy, iqtisodiy, siyosiy va huquqiy omillar majmui tushuniladi. Farmasevtika marketingida ichki va tashqi muhitlar farqlanadi.
Ichki muhitni shakllantiruvchi omillar – farmasevtika firma rahbariyati tomonidan nazorat qilinadigan texnologik jarayon, moliyaviy ahvol, tashkiliy tuzilma, farmasevtika bozorini tanlash va boshqalar bilan bog‘liqdir.
Nazorat qilinuvchi omillar dori vositalarini ishlab chiqaruvchi korxonalar va farmasevtika marketingining dorixonada xizmat ko‘rsatish boshqaradi. Ana shu omillardan farmasevtika marketingi dorixonada xizmat ko‘rsatish tomonidan nazorat qilinmaydigan ayrimlarini oliy rahbariyat boshqaradi. Uncha katta bo‘lmagan yoki o‘rtacha dori vositalarini ishlab chiqaruvchi korxonalarda umumiy siyosat masalalarini ham, farmasevtika marketingi qarorlarini ham, bir shaxs, odatda, mulk egasi yoki oliy rahbariyat qabul qiladi, lekin bunday hollarda dastavval umumiy maqsadni belgilash, so‘ngra ularga farmasevtika marketingi rejalarini moslashtirish kerak.
Farmasevtika korxonalarining maqsadga erishishida muvaffaqiyatiga oid omillar
Oliy rahbariyat tomonidan boshqariladigan omillar – farmasevtika firma boshqaruvida ko‘plab turli-tuman qarorlarni qabul qilinadi. Lekin farmasevtika marketingi nuqtai nazaridan qaraganda marketologlar uchun oliy rahbariyatning quyidagi masalalariga dahldor fikrlari eng muhim hisoblanadi:
– farmasevtika faoliyati sohalari;
– umumiy maqsad;
– farmasevtika marketingining roli;
– boshqa tadbirkorlik vazifalarining roli;
– korporatsion madaniyat.